«Առինջ մոլի» աշխատակիցները ստորագրահավաք են սկսել. պահանջում են վերաբացել կապարակնքված տաղավարները

«Առինջ մոլի» աշխատակիցներն այսօր ստորագրահավաք են սկսել՝ իրենց աշխատանքային իրավունքները վերականգնելու պահանջով։ Այս մասին հայտնում է «Փաստինֆո»-ն:

«Այսօր ոչինչ չենք արել, նույնիսկ մոլում չեմ։ Ստորագրահավաք ենք նախաձեռնել, մի քանի մարդ էլ գնացել է Քննչական կոմիտե։ Դեռ չգիտենք ինչ պատասխան են տվել»,-ասել է աշխատակիցներից մեկը։

Հիշեցնենք՝ երեկ «Առինջ մոլի» աշխատակիցները երեկ բողոքի ակցիա էին իրականացնում, քանի որ իրավապահների կողմից կապարակնքվել էին իրենց տաղավարները և խաթարվել էր աշխատանքի բնկանոն հունը։

Աշխատակիցը նշեց, ստորագրահավաքի նպատակը կապարակնքված տաղավարների վերաբացումն է։ «Դրա համար ենք հավաքում, որ հարցին լուծում տան, որովհետև չենք ուզում, որ փակվի, չենք ուզում մեր խանութները լքենք։ Մենք ուզում ենք մեր խանութներում աշխատենք», - ասել է նա` ընդգծելով, որ կաթվածակար է լինում թե՛ գործատուների աշխատանքը, թե աշխատողների կարգավիճակը։

Նշենք, որ «Առինջ» մոլի սեփականատերը գործարար, «Բարգավաճ Հայաստան» կուսակցության առաջնորդ Գագիկ Ծառուկյանն է, որը կալանքի տակ է գտնվում։ Նրան պատկանող ընկերությունների դռները կապարակնքված են, իսկ ընկերությունների աշխատակիցները հարկադիր պարապուրդի են մատնված։