ԵՄ-ն ԱՄՆ-ից պարզաբանումներ կպահանջի նոր մաքսատուրքերի վերաբերյալ

Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալասը հայտարարել է, որ ԱՄՆ-ի սահմանած նոր մաքսատուրքերը լիովին անսպասելի էին ԵՄ-ի համար։ Այս մասին հայտնում է Reuters-ը։

ԱՄՆ առևտրային ներկայացուցչի գրասենյակը հայտարարել է, որ Վաշինգտոնը 60 առևտրային գործընկերների նկատմամբ սահմանում է 10%-ից մինչև 12,5% մաքսատուրքեր՝ կախված այն հանգամանքից, թե տվյալ երկրներում օրենսդրորեն արգելվա՞ծ է, արդյոք, հարկադիր աշխատանքի միջոցով արտադրված ապրանքների ներմուծումը։

Կալասի խոսքով՝ ԵՄ-ն և ԱՄՆ-ն նախկինում ձեռք էին բերել առևտրային համաձայնություն, և եվրոպական կողմը կատարել է իր պարտավորությունները։

«Մենք գործարք ունեինք Ամերիկայի հետ, և մենք այն պահպանել ենք։ Այդ պատճառով այդ պայմանավորվածության չկատարումը մեզ համար տհաճ անակնկալ էր»,- ասել է նա։

Կալասը նշել է, որ Բրյուսելը Սպիտակ տնից պաշտոնական պարզաբանումներ կպահանջի նոր մաքսատուրքերի վերաբերյալ։ Նա նաև անհիմն է որակել այն պնդումները, թե ԵՄ օրենսդրությունն ունի թերություններ հարկադիր աշխատանքի կանխարգելման ոլորտում։

Հիշեցնենք, որ 2025 թվականի օգոստոսին Վաշինգտոնն ու Բրյուսելը հայտարարել էին առևտրի վերաբերյալ շրջանակային համաձայնագրի ձեռքբերման մասին, որի համաձայն Եվրամիությունը պետք է վերացներ ԱՄՆ-ից ներմուծվող բոլոր արդյունաբերական ապրանքների մաքսատուրքերը, իսկ ԱՄՆ-ը պահպաներ 15% մաքսատուրքը ԵՄ-ից ներմուծվող ապրանքների մեծ մասի նկատմամբ։