Արաղչին ԱՄՆ-ին նախազգուշացրել է Իրանի ակտիվների բռնագրավման հետևանքների մասին

Իրանի արտաքին գործերի նախարար Աբբաս Արաղչին վտանգավոր նախադեպ է անվանել ԱՄՆ նախագահ Դոնալդ Թրամփի հայտարարությունը, ըստ որի՝ ԱՄՆ-ում սառեցված իրանական ակտիվները կօգտագործվեն Մերձավոր Արևելքում նավերին և բեռներին հասցված վնասների փոխհատուցման համար։

Արաղչին X-ի իր էջում գրել է, որ այլ պետության ակտիվների բռնագրավումը՝ ապագա և տվյալ գործին չառնչվող պահանջների դիմաց վճարելու նպատակով, ստեղծում է վտանգավոր նախադեպ։

«Նրանք, ովքեր ողջունում են այդ քայլը կամ շահում են այդ միջոցներից, պետք է հիշեն՝ հենց որ կառավարությունները բռնագրավումը դարձնեն ընդունված պրակտիկա, այլևս ոչ մի երկրի ակտիվ ապահով չի լինի։ Հետագա քաոսը չի լինի ո՛չ գեղեցիկ, ո՛չ խաղաղ»,- նշել է Իրանի ԱԳ նախարարը։

Թրամփը հուլիսի 23-ին հայտարարել էր, որ սառեցված իրանական միջոցները կուղղվեն Մերձավոր Արևելքում նավերին հասցված վնասների փոխհատուցմանը։

Նրա հայտարարությունը հնչել է այն բանից հետո, երբ Իրանի աջակցությունը վայելող հութի ապստամբները Կարմիր ծովում հարձակումներ են իրականացրել Սաուդյան Արաբիայի նավերի վրա, ինչի հետևանքով նավթի գինը հուլիսի 23-ին առաջին անգամ մայիսից ի վեր գերազանցել է մեկ բարելի դիմաց 100 դոլարը։

Իրանի ակտիվների սառեցման հարցը հունիսին ԱՄՆ-ի և Իրանի միջև ստորագրված փոխըմբռնման հուշագրի առանցքային կետերից էր, սակայն հուլիսին պայմանավորվածությունը խախտվեց այն բանից հետո, երբ ԱՄՆ-ը վերսկսեց հարվածները Իրանի դեմ՝ Թեհրանի կողմից Օրմուզի նեղուցում նավերի գնդակոծության ֆոնին։