Ադրբեջանը բողոքել է ԱՄՆ Կոնգրեսի՝ հայ գերիներին վերաբերող օրինագծի դեմ

Ադրբեջանի Միլի Մեջլիսը խիստ բողոք է հայտնել ԱՄՆ Ներկայացուցիչների պալատի արտաքին հարաբերությունների հանձնաժողովի կողմից հուլիսի 22-ին ընդունված H.R. 9087 օրինագծի շրջանակում ընդունված փոփոխության կապակցությամբ։

Խորհրդարանի հայտարարության մեջ նշվում է, որ Ադրբեջանի հասցեին հնչեցված մեղադրանքներն անհիմն են, իսկ նախաձեռնությունը միջազգային իրավունքի նորմերի և սկզբունքների անտեսման հերթական օրինակն է։ Բաքվի գնահատմամբ՝ այն նպատակ ունի ԱՄՆ Կոնգրեսը օգտագործել որպես քաղաքական ճնշման գործիք՝ ի շահ հայկական լոբբիի։

Միլի Մեջլիսը նաև պնդում է, որ փոփոխության հեղինակ կոնգրեսական Բրեդ Շերմանը սերտ կապեր ունի հայկական լոբբիստական խմբերի հետ և հետևողականորեն առաջ է մղում դրանց քաղաքական օրակարգը։

Հայտարարության մեջ քննադատության են ենթարկվել նաև Միջազգային քրեական դատարանի նախկին դատախազ Լուիս Մորենո Օկամպոն, ինչպես նաև Եվրոպայի խորհրդի խորհրդարանական վեհաժողովի մի շարք պատգամավորներ, որոնց Ադրբեջանը մեղադրում է երկրի նկատմամբ կանխակալ վերաբերմունքի և հակաադրբեջանական արշավի մասնակցության մեջ։

Ադրբեջանի խորհրդարանը նաև մերժել է փոփոխության մեջ օգտագործված «ռազմագերիներ» և «քաղաքական բանտարկյալներ» ձևակերպումները՝ պնդելով, որ խոսքը վերաբերում է Ադրբեջանի դատարանների կողմից պատերազմական հանցագործությունների, ահաբեկչության, խոշտանգումների և այլ ծանր հանցագործությունների համար դատապարտված անձանց։

Միլի Մեջլիսը կոչ է արել ԱՄՆ կոնգրեսականներին հրաժարվել հայկական լոբբիստական խմբերի ազդեցությամբ որոշումներ ընդունելու գործելակերպից, հարգել Ադրբեջանի ինքնիշխանությունն ու միջազգային իրավունքը և չխոչընդոտել Հարավային Կովկասում խաղաղության գործընթացին։

Հիշեցնենք, որ H.R. 9087-ը ԱՄՆ արտաքին քաղաքականությանը վերաբերող օրինագիծ է, որի շրջանակում կոնգրեսական Բրեդ Շերմանի ներկայացրած փոփոխությամբ ԱՄՆ Ներկայացուցիչների պալատի արտաքին հարաբերությունների հանձնաժողովը կոչ է արել Ադրբեջանին անհապաղ և առանց նախապայմանների ազատ արձակել հայ ռազմագերիներին և քաղաքական բանտարկյալներին։ Հենց այդ փոփոխության դեմ էլ բողոք է հայտնել Ադրբեջանի Միլի Մեջլիսը։