Մոսկվան կրկին առաջարկել է աջակցություն Հայաստանին և Ադրբեջանին

Ռուսաստանի Դաշնության արտաքին գործերի նախարարությունը, Ադրբեջանի արտգործնախարար Ջեյհուն Բայրամովի՝ Ռուսաստան կատարելիք պաշտոնական այցի նախօրեին, հայտնել է Հարավային Կովկասում խաղաղության ու կայունության կարևորության և Երևանի ու Բաքվի միջև հարաբերությունների կարգավորմանն աջակցելու պատրաստակամության մասին:

ՌԴ արտաքին քաղաքական գերատեսչության տարածած հաղորդագրության մեջ նշվում է, որ Մոսկվայի համար առաջնային նշանակություն ունեն Հարավային Կովկասի խաղաղությունն ու կայունությունը։ Ռուսական կողմն ընդգծել է, որ նախկինի պես պատրաստ է տրամադրել անհրաժեշտ օժանդակությունը Ադրբեջանի և Հայաստանի միջև հարաբերությունների ամբողջական կարգավորման հարցում։ Դա մասնավորապես վերաբերում է խաղաղության պայմանագրի ստորագրմանը, սահմանների սահմանազատմանը, ինչպես նաև տրանսպորտային ու տնտեսական հաղորդակցությունների ապաշրջափակմանը։