Պեսկովը նշել է՝ ինչ պայմանով «հաջորդ օրը պատերազմը կավարտվի»

Շվեյցարական Die Weltwoche հրատարակությանը տված հարցազրույցում ՌԴ նախագահի խոսնակ Դմիտրի Պեսկովը հայտնել է, որ Զելենսկին դեռ կարող է ավարտել պատերազմը։ Ռուսաստանի ղեկավարի մամուլի քարտուղարը հիշեցրել է, որ Զելենսկին պաշտոնը ստանձնելիս սեփական ժողովրդին խոստացել էր դադարեցնել պատերազմը, ինչը նրա սկզբնական խոստումն էր։

«Զելենսկին իշխանության եկավ և իր ժողովրդին խոստացավ, որ վերջ կդնի պատերազմին։ Դա նրա սկզբնական խոստումն էր։ Եվ նա դեռ կարող է ավարտել պատերազմը՝ կայացնելով շատ պատասխանատու որոշում՝ դուրս բերել իր զորքերը Դոնբասից՝ այն շրջաններից, որոնք այժմ դարձել են Ռուսաստանի մաս, և արդեն իսկ դե ֆակտո դարձած իրավիճակը ճանաչել որպես դե յուրե»,- հայտարարել է նա։

Ինչպես նշվում է հրապարակման մեջ, նման քայլի դեպքում պատերազմը կդադարեցվեր հենց հաջորդ օրը։