Եվրախորհրդարանը դատապարտել է 1974-ի թուրքական ներխուժման ընթացքում կիպացի կանանց նկատմամբ բռնությունը

Եվրոպական խորհրդարանը բանաձև է ընդունել, որով առաջին անգամ 1974 թվականին Թուրքիայի կողմից Կիպրոս ներխուժման ընթացքում սեռական բռնության ենթարկված կիպրացի կանանց և աղջիկներին պաշտոնապես ճանաչել է այդ հանցագործությունների զոհեր։ Այս մասին փոխանցում է Factor.am-ը։

Բանաձևն ընդունվել է 575 կողմ, 33 դեմ ձայների հարաբերակցությամբ՝ հիմնվելով Հունաստանի «Նոր դեմոկրատիա» կուսակցության եվրապատգամավոր Էլեոնորա Մելեթիի զեկույցի վրա։

Ըստ փաստաթղթի` 

դատապարտվում է Թուրքիայի ներխուժումն ու Կիպրոսի հյուսիսային հատվածի շարունակվող օկուպացիան, 

սեռական բռնությունը ճանաչվում է որպես պատերազմի զենք, 

և կոչ է արվում վերականգնել զոհերի իրավունքները, ապահովել փոխհատուցում և աջակցություն, 

Թուրքիային՝ պատասխանատվության ենթարկել միջազգային իրավունքի համաձայն։

Ստրասբուրգում ունեցած ելույթի ընթացքում Մելեթին ներկայացրել է Կանանց իրավունքների և գենդերային հավասարության կոմիտեի (FEMM) պատվիրակության՝ Կիպրոս կատարած այցի ընթացքում լսած վկայությունները՝ նշելով, որ բռնությունը զոհերի նկատմամբ շարունակվել է նաև տարիներ անց՝ խարանի, մեկուսացման, մարգինալացման և լռեցման միջոցով։

Թուրքիայի արտաքին գործերի նախարարությունը դատապարտել է բանաձևը՝ այն անվանելով «անհիմն և անհեթեթ մեղադրանքներով լի»։ Անկարան հայտարարել է, որ ամբողջությամբ աջակցում է այս հարցով Հյուսիսային Կիպրոսի թուրքական հանրապետության արտաքին գործերի նախարարության դիրքորոշմանը և պնդել, որ Եվրախորհրդարանի մոտեցումը կողմնակալ է ու հեռու պատմական իրողություններից։