Ուկրաինան ուժեղացրել է հարձակումները Ղրիմի ուղղությամբ՝ թիրախավորելով ծովային ուղիները

Ուկրաինայի զինված ուժերը ակտիվացրել են հարձակումները Ռուսաստանի կողմից բռնակցված Ղրիմի ուղղությամբ՝ թիրախավորելով ոչ միայն ցամաքային մատակարարման ուղիները, այլև ծովային երթուղիները։ Այս մասին հայտնում է BBC-ն։

 Ուկրաինայի անօդաչու համակարգերի ուժերի հրամանատար Ռոբերտ Բրովդին, որը հայտնի է «Մաջյար» մականունով, հայտարարել է, որ վերջին չորս օրերի ընթացքում Ազովի ծովում առնվազն 25 նավ է հարվածի ենթարկվել և հրդեհվել։

Ուկրաինական կողմը պնդում է, որ թիրախավորված նավերի մեծ մասը կապված է եղել Ռուսաստանի «ստվերային նավատորմի» հետ՝ ներառյալ նավթատարներ, որոնք օգտագործվում են էներգակիրների տեղափոխման համար։

Հարձակումները կարող են լինել Ուկրաինայի կողմից հայտարարված «լոգիստիկ շրջափակման» նոր փուլը՝ նպատակ ունենալով խափանել Ղրիմ մատակարարումների իրականացումը։

Ռոստովի մարզի նահանգապետ Յուրի Սլյուսարը հայտնել է, որ Ազովի ծովի Տագանրոգի ծոցում հարձակման են ենթարկվել երկու դատարկ նավթատարներ։ Նրա խոսքով՝ հրդեհները շարունակվել են նաև հաջորդ օրը։

Բացի այդ, Ուկրաինայի զինված ուժերի գլխավոր շտաբը հրապարակել է տեսանյութ, որտեղ, ըստ Կիևի, երևում է ծովային անօդաչու սարքի հարձակումը ռուսական պատժամիջոցների տակ գտնվող «Blue» նավթատարի վրա։

Հարձակումները տեղի են ունենում նաև Ռուսաստանի նավթավերամշակման գործարաններին և նավթային ենթակառուցվածքներին, ինչի հետևանքով երկրի մի շարք շրջաններում արձանագրվել են վառելիքի մատակարարման խնդիրներ։

Ուկրաինայի նախագահ Վոլոդիմիր Զելենսկին հայտարարել է, որ նավթային օբյեկտների դեմ հարվածները պատասխան են Ռուսաստանի գործողություններին և նպատակ ունեն ցույց տալ ռուս քաղաքացիներին պատերազմի հետևանքները։