Արեգնազ Մանուկյանի նկատմամբ հարուցվել է հանրային քրեական հետապնդում

AuroraNews.am-ին ՔԿ-ից հայտնեցին, որ քրեական վարույթի շրջանակում Արեգնազ Մանուկյանի նկատմամբ հարուցվել է հանրային քրեական հետապնդում՝ Քրեական օրենսգրքի 427-րդ հոդվածի 1-ին մասով (պետական գաղտնիք պարունակող տեղեկություններ հրապարակելը): Նա ձերբակալվել է՝ դատարան ներկայացնելու համար:

Հիշեցնենք, որ ավելի վաղ «Մայր Հայաստան» կուսակցության վարչության անդամ, ԲՀԿ-ից պատգամավորության թեկնածու Արեգնազ Մանուկյանը քրեական վարույթի շրջանակում ձերբակալվել է՝ դատարան ներկայացնելու նպատակով։ 

Այսօր՝ հուլիսի 9-ի վաղ առավոտյան, իրավապահները խուզարկություն են իրականացրել Արեգնազ Մանուկյանի բնակարանում։ Մանուկյանը տեսանյութ էր հրապարակել, որտեղ իրավապահներից պահանջում էր ներկայանալ և պարզաբանել, թե ինչ նպատակով են մտել իր տուն։ Նրա խոսքով՝ իրավապահները նաև վերցրել են իր հեռախոսը։

Ավելի ուշ Երևանի ավագանու «Մայր Հայաստան» խմբակցության ղեկավար Մանուկ Սուքիասյանը հայտնել էր, որ Արեգնազ Մանուկյանին բերման են ենթարկել:

Նշենք, որ նույն քրեական վարույթով կալանավորված է նաև ԲՀԿ ցուցակի երկրորդ համար, «Մայր Հայաստան» կուսակցության նախագահ Անդրանիկ Թևանյանը։