Ուկրաինական ԱԹՍ-ների զանգվածային հարձակումներ Ռուսաստանի մի շարք շրջանների վրա․ Կան զոհ

Ուկրաինական անօդաչու թռչող սարքերը հարձակվել են Ռուսաստանի մի շարք շրջանների վրա։ Հարվածների հետևանքով վնասներ են գրանցվել, իսկ Բելգորոդի մարզում հաղորդվում է մեկ զոհի և երեք վիրավորի մասին։

Կալուգայի մարզի նահանգապետ Վլադիսլավ Շապշայի խոսքով՝ անօդաչուները հարվածել են Ձերժինսկի շրջանում գտնվող օբյեկտի։ Նրա տվյալներով՝ միջադեպի հետևանքով տուժածներ չկան։

Ռուսական աղբյուրները հայտնում են, որ թիրախներից մեկը եղել է «Պերվի զավոդ» նավթավերամշակման գործարանը, որի նախագծային հզորությունը տարեկան շուրջ 1,2 միլիոն տոննա է։ Այդ տարածքում տեղակայված են նաև նավթի պահեստ և մի շարք արդյունաբերական ձեռնարկություններ։

Միաժամանակ, Բելգորոդի մարզում գիշերը տեղի ունեցած հարձակման հետևանքով, ըստ տեղական իշխանությունների, զոհվել է մեկ մարդ, ևս երեքը վիրավորվել են։ Բելգորոդի ղեկավար Ալեքսանդր Շուվաևի խոսքով՝ վնասվել են էներգետիկ ենթակառուցվածքներ, ինչի հետևանքով որոշ հատվածներում արձանագրվել են էլեկտրամատակարարման և ջրամատակարարման խափանումներ։

Նրա տվյալներով՝ հարվածից հետո հրդեհ է բռնկվել նաև գազային ենթակառուցվածքի օբյեկտներից մեկում, ինչը հանգեցրել է Բելգորոդում գազամատակարարման խափանումների։

Մոսկվայի քաղաքապետ Սերգեյ Սոբյանինը հայտարարել է, որ գիշերվա ընթացքում ավելի քան 430 անօդաչու թռչող սարք է փորձել հարձակվել Մոսկվայի և Մոսկվայի մարզի ուղղությամբ։ Նրա խոսքով՝ դրանց մեծ մասը ոչնչացվել է ՀՕՊ համակարգերի կողմից՝ քաղաքին մոտենալուց առաջ։

Ավելի վաղ Ռուսաստանի պաշտպանության նախարարությունը հայտնել էր, որ գիշերվա ընթացքում երկրի տարբեր շրջանների և հարակից ջրային տարածքների վրա ՀՕՊ համակարգերը խոցել են 452 ուկրաինական անօդաչու թռչող սարք։

Տեղեկությունները ներկայացվել են ռուսական պաշտոնական աղբյուրների հաղորդմամբ։