Խուզարկությունների հետևանքով Ծառուկյանին պատկանող մի շարք ընկերությունների աշխատանքը կաթվածահար է եղել. Իվետա Տոնոյան

ԲՀԿ խոսնակ Իվետա Տոնոյանը հայտարարել է, որ Գագիկ Ծառուկյանին պատկանող մի շարք ընկերություններում իրականացվող խուզարկությունների հետևանքով հազարավոր աշխատակիցներ չեն կարողանում բնականոն աշխատել։

Նրա խոսքով՝ խոսքը վերաբերում է «Արարատ Ցեմենտ»-ին, Երևանի Արարատի կոնյակի-գինու-օղու կոմբինատին, «Օլիմպավան»-ին, «Մուլտի Ուելնես» համալիրին, «Մուլտի Ռեստ» և «Մուլտի Գրանդ» հյուրանոցներին, ինչպես նաև այլ ընկերությունների, որոնց գործունեությունը, ըստ Տոնոյանի, այս պահին պարալիզացված է։

Տոնոյանը նաև նշել է, որ «Օլիմպավան»-ից դուրս են բերվել Հայաստանում ուսումնամարզական հավաքներ անցկացնող տարբեր մարզաձևերի օտարերկրյա մարզիկներ։

«Սա միջազգային սկանդալ է։ Բնականաբար, Միջազգային օլիմպիական կոմիտեն և համապատասխան մարզական ֆեդերացիաները ուշադրություն են դարձնելու այս հանգամանքին։ Երկրի միջազգային հեղինակության հետ նման ձևով խաղալն արդեն դարձել է իշխանությունների օրակարգը»,- ասել է նա։

ԲՀԿ խոսնակի գնահատմամբ՝ տեղի ունեցողը քաղաքական և տնտեսական ճնշում է Գագիկ Ծառուկյանի նկատմամբ։

«Սա քաղաքական և տնտեսական տեռորի հերթական դրսևորումներից մեկն է։ Մեզ համար այս ամենը սպասելի էր։ Մնացածի մասին կխոսենք, երբ պարզ դառնա, թե ինչ հոդվածներով և ինչ գործերով են հարուցվել վարույթները»,- հայտարարել է Տոնոյանը։