Ֆրանսիայի հարավում անտառային խոշոր հրդեհի պատճառով տարհանվել է ավելի քան 10 հազար մարդ

Հրդեհը բռնկվել է Պերպինյանի մերձակայքում՝ Տրևիլակ բնակավայրի շրջանում, Ֆրանսիական Պիրենեյների նախալեռներում՝ Իսպանիայի սահմանի մոտ։ Այն արդեն ընդգրկել է առնվազն 4 հազար 600 հեկտար տարածք, հայտնել է տեղի պրեֆեկտ Պիեռ Ռենյո դը լա Մոթը։

Ֆրանսիայի ներքին գործերի նախարար Լորան Նյունեզը հայտարարել է, որ իրավիճակը կրկին վատթարանում է, և հրշեջների պայքարը շարունակվում է։ Իշխանությունների գնահատմամբ՝ ուժեղ քամիները կարող են նպաստել կրակի հետագա տարածմանը։

Տեղի բնակիչների խոսքով՝ հրդեհը տներին մոտեցել էր մինչև 300 մետր, իսկ կրակի տարածման արագությունը խուճապային իրավիճակ էր ստեղծել։

Հրդեհի պատճառով Tour de France հեծանվային բազմօրյա մրցավազքի կազմակերպիչները հանդիսատեսին կոչ են արել չմոտենալ երրորդ փուլի ավարտական հատվածին, որպեսզի արտակարգ ծառայությունների մեքենաները կարողանան անարգել հասնել դեպքի վայր։

Մրցավազքի 195,9 կիլոմետր երկարությամբ երրորդ փուլը մեկնարկել է Իսպանիայի Գրանոլյերս քաղաքից և ավարտվելու է Ֆրանսիայի Պիրենե-Օրիանտալ շրջանում գտնվող Լե Անգլ բնակավայրում։