ՏԵՍԱՆՅՈՒԹ․ ՔՊ-ում պաշտոնները չեն բաժանում, ընդդիմադիրներն են որոշում մանդատները վերցնել- չվերցնել․ Ռուբինյան

Ազգային ժողովի նախագահի թեկնածու Ռուբեն Ռուբինյանը հայտարարել է, որ «Քաղաքացիական պայմանագիր» կուսակցությունում պաշտոնների բաժանում չի իրականացվում։

Նրա խոսքով՝ կուսակցությունում որոշվում է, թե ում որ պաշտոնին պետք է առաջադրեն, իսկ պաշտոններում ընտրվելը տեղի է ունենում Ազգային ժողովի քվեարկությամբ՝ նոր խորհրդարանի ձևավորումից հետո։

Անդրադառնալով ընդդիմության կողմից Սահմանադրական դատարան ներկայացված դիմումին՝ Ռուբինյանն ասել է, որ անհասկանալի է, թե ինչու է ընդդիմությունն արդեն այժմ քննարկում մանդատները վերցնելու կամ չվերցնելու հարցը, եթե սպասում է Սահմանադրական դատարանի որոշմանը։

«Իրենք ասում են՝ մեր ընտրողների 60 տոկոսն ասում է՝ վերցրեք մանդատները, 40 տոկոսը՝ մի վերցրեք։ Միևնույն ժամանակ մամուլում քննարկվում է, թե ով կարող է առաջադրվել ԱԺ փոխնախագահի կամ այլ պաշտոնների համար»,– նշել է նա։

Ռուբինյանի խոսքով՝ Սահմանադրական դատարանը կկայացնի իր որոշումը, սակայն իշխանությունը վստահ է, որ ընտրություններն անցկացվել են արդար և թափանցիկ։

«Մենք վստահ ենք, որ ընտրություններն արդար են անցել, թափանցիկ են անցել։ Մենք մեր աչքերն ունենք, որևէ խնդիր չենք տեսնում»,– ասել է Ռուբինյանը։