Լիտվան հրաժարվում է միջուկային զենքի տեղակայման սահմանադրական արգելքից

Լիտվայի Սեյմը գրանցել է օրինագիծ, որով նախատեսվում է հրաժարվել երկրի տարածքում միջուկային զենքի տեղակայման սահմանադրական արգելքից։ Այս մասին հայտնել է օրենսդիր մարմնի քարտուղարությունը։

Նախաձեռնությանը ստորագրություններով աջակցել է 50 պատգամավոր, ինչը բավարար է օրինագծի գրանցման համար։

Նոր նախագծով առաջարկվում է փոփոխել Լիտվայի Սահմանադրությունը և հանել 137-րդ հոդվածը, որը ներկայումս արգելում է զանգվածային ոչնչացման, այդ թվում՝ միջուկային զենքի տեղակայումը երկրի տարածքում։

Նախօրեին երկրի նախագահ Գիտանաս Նաուսեդան անցկացրել է խորհրդակցություն վարչապետի, պաշտպանության նախարարի, Սեյմի նախագահի և խորհրդարանական խմբակցությունների ղեկավարների մասնակցությամբ։ Քննարկումների արդյունքում աջակցություն է հայտնվել սահմանադրական արգելքի վերացման նախաձեռնությանը։

Սահմանադրական փոփոխության ընդունման համար անհրաժեշտ է Սեյմում երկու անգամ քվեարկություն՝ երեք ամսվա ընդմիջմամբ, ինչպես նաև որակյալ մեծամասնության աջակցություն՝ առնվազն 141-ից 94 ձայն։