Հայաստանը գնում է դեպի ԵՄ անդամակցություն. Փաշինյան

Ժողովրդավարական բարեփոխումների գործում ԵՄ-ը շատ երկար ժամանակ, այդ թվում՝ մինչև 2018 թվականի հեղափոխությունը, եղել է Հայաստանի թիվ մեկ գործընկերը, ինչի մասին Եվրոպական հանձնաժողովի նախագահ Ուրսուլա ֆոն դեր Լայենի հետ համատեղ ասուլիսի ընթացքում հայտարարել է վարչապետ Նիկոլ Փաշինյանը՝ պատասխանելով Հանրային հեռուստաընկերության լրագրողի հարցին:

Նա նշել է, որ այլ խնդիր է, թե ինչ արդյունավետությամբ ու անկեղծությամբ է իրականացվել այդ օրակարգը, սակայն հիմա՝ ընտրություններից հետո, կարևոր առիթ է համարում ժողովրդավարական բարեփոխումների օրակարգի ռեստարտը: Ըստ վարչապետի՝ նախորդ շրջանում իրենք հետևողական են եղել այդ ճանապարհին, բայց այն անընդհատ զուգակցվել է մեծ խնդիրներով՝ COVID-19-ով, պատերազմով և հետպատերազմական իրավիճակով, ինչի պատճառով գործնականում հնարավորություն չեն ունեցել լիարժեք կենտրոնանալ այդ օրակարգի վրա:

Նիկոլ Փաշինյանն ընդգծել է, որ ընտրությունները, այս նոր շրջանը, ինչպես նաև ԵՄ-ի հետ հարաբերությունների նոր մակարդակն ու ծավալը պատմական շանս են ստեղծում, և իրենց ռազմավարությունը հստակ է հայտարարված:

«Խնդիր համար առաջինը, որը մենք պետք է լուծենք, լիարժեք, անկեղծ և ամբողջական համապատասխանությունն է ԵՄ չափանիշներին։ Սա առաջին ռազմավարական խնդիրն է, որը մենք պետք է լուծենք, որից հետո արդեն առավել կոնկրետ իրագործման օրակարգ կարող է դառնալ Եվրոպական միության լիարժեք անդամ դառնալու խնդիրը, որն արդեն քաղաքական հարց է։ Բայց, ինչպես նախկինում ասել եմ, երբ մենք լիարժեք և անկեղծորեն համապատասխան կլինենք ԵՄ չափանիշներին, դա մեզ հնարավորություն կտա լինել ԵՄ լիարժեք անդամ։ Սակայն դա նաև քաղաքական հարց է, որը կախված է ամենատարբեր գործոններից։ Եթե մեզ հաջողվի դառնալ ԵՄ անդամ, դա կլինի շատ մեծ ձեռքբերում։ Եթե ինչ-որ պատճառով ԵՄ-ը որոշի, որ այլևս չի ընդլայնվում, այդ դեպքում մենք նույնպես մեծապես շահած դուրս կգանք, որովհետև կլինենք երկիր, որը լիարժեք համապատասխանում է ԵՄ չափանիշներին։ Սա ԵՄ-ի համար չի արվում, սա արվում է Հայաստանի Հանրապետության քաղաքացիների, Հայաստանի Հանրապետության համար, և սա այն ռազմավարական նպատակն է, որը մենք հետապնդում ենք»,- հայտարարել է կառավարության ղեկավարը:

Նաև հավելել է, որ տարածաշրջանային կապուղիների բացման հետ կապված նոր հնարավորությունները նույնպես չափազանց կարևոր են: Փաշինյանը հիշեցրել է նախընտրական շրջանում իր կողմից բազմիցս հնչեցրած միտքն այն մասին, որ Հայաստանը կոնֆլիկտի փակուղուց վերածվում է խաղաղության խաչմերուկի, ինչը պատմական իրադարձություն է: Վարչապետը շնորհակալություն է հայտնել Եվրոպական միությանը այս ջանքերում Հայաստանի Հանրապետությանն ու հայ ժողովրդին հետևողականորեն և ամբողջապես աջակցելու համար՝ շեշտելով, որ դա շատ բարձր է գնահատվում:

«Նույնիսկ հիմա, երբ հետադարձ հայացք ենք գցում, աներևակայելի է, թե վերջին տարիներին ինչ արագությամբ են զարգացել ՀՀ-ԵՄ հարաբերությունները, և որևէ նշան չկա, որ զարգացման այդ տեմպերը դանդաղելու են, և ես դրա համար շատ ուրախ եմ»,- եզրափակել է նա: