Երկաթուղին Հայաստանի սեփականությունն է և պետք է ծառայի միայն ՀՀ շահերին․ Փաշինյան

Վարչապետ Նիկոլ Փաշինյանը հայտարարել է, որ Հայաստանի երկաթուղիները Հայաստանի Հանրապետության սեփականությունն են և պետք է կառավարվեն բացառապես երկրի շահերից ելնելով։

Նրա խոսքով՝ այս փուլում չի կարող մանրամասներ հայտնել, քանի որ հարցը դեռ գտնվում է իրավական խորհրդակցությունների և աշխատանքային քննարկումների փուլում։ Միևնույն ժամանակ վարչապետը նշել է, որ գործընթացների մասին տեղյակ է նաև «Հարավկովկասյան երկաթուղի» ընկերությունը և ներգրավված է քննարկումներում։

«Դա մեր երկաթուղին է, Հայաստանի Հանրապետության սեփականությունն է, և մենք մեր սեփականությունը պետք է կառավարենք։ Կարող եմ վճռականորեն ասել մեկ բան՝ երկաթուղիները Հայաստանի սեփականությունն են և պետք է ծառայեն Հայաստանի Հանրապետության շահերին։ Ուրիշ տարբերակ պարզապես չի կարող լինել»,– ասել է Փաշինյանը։

Վարչապետն ընդգծել է, որ անընդունելի է այն մոտեցումը, ըստ որի երկաթուղին կարող է մնալ չօգտագործվող կամ «փակուղի»՝ միայն այն պատճառով, որ առկա են տարբեր հանգամանքներ։ Նրա խոսքով՝ պետական սեփականությունը պետք է արդյունավետ կառավարվի և ծառայի երկրի զարգացմանն ու ազգային շահերին։