Վանաձորում զինծառայողի կրակոցներից հետո վարույթ է նախաձեռնվել. ՔԿ

Պայմանագրային զինծառայողը Վանաձոր քաղաքի ամայի տարածքում համոզված լինելով, որ մոտակայքում քաղաքացիներ չկան, իրեն պատկանող, նախնական տվյալներով՝ օդաճնշիչ ատրճանակով, որը լիցքավորված է եղել մանր գնդիկներով, մի քանի անգամ կրակել է գետնին: Այս մասին հայտնում են ՔԿ-ից:

«Այդ ընթացքում նրան է մոտեցել տարածքում շրջիկ ծառայություն իրականացնող ոստիկանը, ում զինծառայողն ինքնակամ ներկայացրել է ձեռքին եղած օդաճնշիչ ատրճանակը և հայտնել, որ այն պատկանում է իրեն:   

Մամուլում որպես դեպքի վայր ներկայացվում են լուսանկարներ, որոնք իրականությանը չեն համապատասխանում: Նախաձեռնվել է քրեական վարույթ՝ դեպքի հանգամանքները պարզելու ուղղությամբ»,- ասված է հաղորդագրության մեջ:

Հիշեցնենք`  Shamshyan.com-ը հայտնել էր, որ Հունիսի 28-ին Լոռու մարզում հնչած կրակոցների դեպքով ոստիկանության ծառայողը հայտնաբերել է ատրճանակից կրակող տղամարդու:

Ժամը 15։30-ի սահմաններում ՀՀ ներքին գործերի նախարարության ոստիկանության համայնքային ոստիկանության գլխավոր վարչության Բազումի բաժին է դիմել ՀՀ ՆԳՆ ոստիկանության գվարդիայի Վանաձորի պահպանության բաժնի դատավարության մասնակիցների պաշտպանության խմբի տեսուչը: Նա հայտնել է, որ ծառայություն իրականացնելիս Վանաձոր քաղաքի Ալավերդյան փողոցի 49Ա հասցեի մոտակայքում նկատել է մի տղամարդու, որը կրակոցներ էր արձակում ատրճանակին նմանվող առարկայից: Մոտենալով նրան՝ տեսուչը պարզել է, որ այդ անձը Լոռու մարզի բնակիչ, 35-ամյա Ֆրունզիկ Ս․-ն է։