Թրամփը պահանջել է անհապաղ իջեցնել բենզինի գինը

ԱՄՆ նախագահ Դոնալդ Թրամփը կոչ է արել երկրում բենզին վաճառող ընկերություններին անհապաղ նվազեցնել վառելիքի գինը՝ հայտարարելով, որ հակառակ դեպքում նրանց «մեծ խնդիրներ են սպասվում»։

«Արմենպրես»-ի փոխանցմամբ, Truth Social հարթակում հրապարակված գրառմամբ Թրամփը նշել է, որ բենզինի ներկայիս գինը չափազանց բարձր է՝ հաշվի առնելով, որ նավթի մեկ բարելի արժեքը մոտ 68 դոլար է և շարունակում է նվազել։

«Բենզինի մանրածախ վաճառողները պետք է անհապաղ իջեցնեն գինը։ Այն չափազանց բարձր է… Մանրածախ վաճառողները պետք է արագ արձագանքեն այս հայտարարությանը և ճիշտ վարվեն», – գրել է նա։

Թրամփը նաև հայտարարել է, որ ԱՄՆ-ում բենզինի գինը պետք է կազմի մոտ 2,50 դոլար մեկ գալոնի (3,785 լիտր) դիմաց։ Նա հավելել է, որ Կալիֆոռնիայի իշխանությունները ևս պետք է նվազեցնեն վառելիքի նկատմամբ սահմանված հարկերը։