ՀՀ գլխավոր դատախազը հանդիպել է Լիտվայի և Լատվիայի գլխավոր դատախազների պատվիրակություններին

ՀՀ գլխավոր դատախազ Աննա Վարդապետյանը 2026 թվականի հունիսի 30-ին Երևանում ընդունել է աշխատանքային այցով Հայաստան ժամանած Լիտվայի և Լատվիայի Հանրապետության գլխավոր դատախազների գլխավորած պատվիրակություններին։

Նախ տեղի է ունեցել հանդիպումը Լիտվայի Հանրապետության գլխավոր դատախազ Նիդա Գրունսկիենեի գլխավորած պատվիրակության հետ։ Քննարկումների ընթացքում կողմերը անդրադարձել են Հայաստանի և Լիտվայի դատախազությունների միջև ձևավորված երկարամյա համագործակցությանը, ինչպես նաև քրեական արդարադատության ոլորտում համատեղ աշխատանքի ընդլայնման հնարավորություններին։

Առանձնահատուկ ուշադրություն է դարձվել անդրազգային հանցավորության, կոռուպցիայի, փողերի լվացման դեմ պայքարին, ինչպես նաև ապօրինի ծագում ունեցող գույքի հայտնաբերման և վերադարձի մեխանիզմների զարգացմանը։

Այնուհետև նույն օրը ՀՀ գլխավոր դատախազը ընդունել է Լատվիայի Հանրապետության գլխավոր դատախազ Արմինս Մեյստերսի գլխավորած պատվիրակությանը։ Հանդիպման ընթացքում ընդգծվել է երկու երկրների միջև միջազգային իրավական համագործակցության արդյունավետությունը և փոխադարձ իրավական օգնության գործիքների կարևորությունը։

Կողմերը քննարկել են նաև Եվրաջասթի շրջանակում համագործակցության խորացման հնարավորությունները՝ անդրադառնալով արդարադատության համակարգերի արդյունավետության բարձրացմանն ու փորձի փոխանակմանը։

Երկու հանդիպումների ընթացքում էլ Աննա Վարդապետյանը շնորհակալություն է հայտնել գործընկերներին միջազգային հարթակներում ակտիվ մասնակցության համար և վերահաստատել համագործակցությունը զարգացնելու պատրաստակամությունը։