ԵՄ–ԱՄՆ նոր առևտրային համաձայնագիրը ուժի մեջ կմտնի հուլիսի 1-ից

Եվրոպական միությունը հուլիսի 1-ից ուժի մեջ է դնելու Միացյալ Նահանգների հետ նոր առևտրային համաձայնագիրը, որի մասին հայտնել է ԵՄ Խորհուրդը։

Համաձայն փաստաթղթի՝ եվրոպական ապրանքները ԱՄՆ-ում կհարկվեն 15% մաքսատուրքով, մինչդեռ ամերիկյան ապրանքները ԵՄ շուկա կմտնեն զրոյական մաքսատուրքով։

ԵՄ Խորհրդի հայտարարության մեջ նշվում է, որ Միությունը ավարտել է համաձայնագրի վավերացման գործընթացը, և այն պաշտոնապես կսկսի գործել հուլիսի 1-ից։

Համաձայնագրով ԵՄ-ն նաև պարտավորվում է մինչև 2028 թվականը ԱՄՆ-ից ձեռք բերել շուրջ 750 միլիարդ դոլարի էներգակիրներ։

Ավելի վաղ ԱՄՆ նախագահ Դոնալդ Թրամփը ԵՄ-ին կոչ էր արել արագացնել համաձայնագրի հաստատումը՝ հուլիսի 4-ի ժամկետով, հակառակ դեպքում սպառնալով նոր մաքսատուրքեր սահմանել եվրոպական ապրանքների նկատմամբ։