Բելգիայի խորհրդարանում բարձրացվել է Ավետիք Չալաբյանի կալանավորման հարցը

Բելգիայի Դաշնային խորհրդարանի պատգամավոր Էլեն Սամինը երկրի արտաքին գործերի նախարար Մաքսիմ Պրևոյին ուղղված բանավոր հարցով անդրադարձել է «ՀայաՔվե» ազգային քաղաքացիական միավորման համակարգող Ավետիք Չալաբյանի կալանավորմանը և Հայաստանում ժողովրդավարության ու իրավունքի գերակայության վիճակին։

Պատգամավորը նշել է, որ Ավետիք Չալաբյանի նախորդ քրեական հետապնդումը ևս միջազգային արձագանք էր ստացել։ Նրա խոսքով՝ այդ գործին անդրադարձել էին Հայաստանում ԱՄՆ դեսպանությունը, Եվրոպայի խորհրդի խորհրդարանական վեհաժողովը և Freedom House-ը՝ մտահոգություններ հայտնելով կամայական կալանքի, արդար դատաքննության և քաղաքական ազատությունների վերաբերյալ։

Էլեն Սամինը Բելգիայի կառավարությանն ուղղել է մի շարք հարցեր՝ հետաքրքրվելով, թե արդյոք Բելգիան և եվրոպական կառույցները հետևում են Չալաբյանի գործին, Հայաստանի հետ պաշտոնական շփումներում բարձրացնո՞ւմ են քաղաքական ազատությունների, ընդդիմության իրավունքների և դատական իշխանության անկախության հարցերը, ինչպես նաև՝ ինչպես է Եվրոպական միությունը համատեղում Հայաստանի հետ համագործակցության խորացումը ընդդիմության նկատմամբ ճնշումների վերաբերյալ հնչող միջազգային մտահոգությունների հետ։

Պատգամավորը նաև հարցրել է՝ կշարունակի՞ արդյոք Բելգիան Եվրամիության շրջանակում պաշտպանել Հայաստանում հիմնարար ազատությունները, քաղաքական բազմակարծությունն ու անկախ դատական համակարգը։