17:00 Լուրերը մեկ տողով. Սոցցանցերի արգելք 16 տարեկանների համար. Իրանի ու Թուրքիայի ռազմական քայլերը

Անցած ժամվա լուրերը՝ հակիրճ և բովանդակային.

•Կոմիտասի հուշարձանի հարակից աղբապատ տարածքը մաքրվել է քաղաքապետարանի համապատասխան ծառայության կողմից։

•Երևանի փոխքաղաքապետ Սուրեն Գրիգորյանն անհիմն է համարում ընդդիմադիրների դիմումները, սակայն նշում է, որ վերջնական որոշումը կայացնելու է Սահմանադրական Դատարանը։

•«Ուժեղ Հայաստան» կուսակցության առաջնորդ Սամվել Կարապետյանը հայտարարել է, որ այլ երկրների քաղաքացիություններից հրաժարվելու համար դատարանը պետք է իրեն ազատ արձակի, որպեսզի կարողանա դիմել դեսպանատներ։

•Հայաստանի վարչապետ Նիկոլ Փաշինյանը և Վրաստանի ներքին գործերի նախարար Սուլխան Թամազաշվիլին Երևանում քննարկել են հանցավորության ու թմրաշրջանառության դեմ համատեղ պայքարի ծրագրերը։

•Հայաստանի կառավարությունը մինչև 2027 թվականի հուլիսի 1-ը երկարաձգել է մի շարք երկրների քաղաքացիների և կացության կարգավիճակ ունեցողների համար վիզայի ժամանակավոր ազատականացման ռեժիմը։

•Իրանի գերագույն առաջնորդ Մոջթաբա Խամենեին հրապարակել է Իսլամաբադի հուշագրի պայմանները, որոնք ներառում են ռազմական գործողությունների դադարեցում, պատժամիջոցների չեղարկում և սառեցված ակտիվների վերադարձ։

•Թուրքիայի պաշտպանության նախարար Յաշար Գյուլերը հայտարարել է, որ Անկարան սեփական հակաօդային պաշտպանությունն ուժեղացնելու նպատակով նախատեսում է գնել SAMPT և Patriot համակարգեր։

•Ադրբեջանի Միլլի Մեջլիսն ընդունել է օրենսդրական փոփոխություններ, որոնցով արգելվում է մինչև 16 տարեկան անձանց գրանցումը սոցիալական ցանցերում։

•Ռուսաստանի Դաշնության կառավարության որոշմամբ վիճակագրական ծառայությունն այլևս չի հրապարակի բենզինի և դիզելային վառելիքի գների աճի վերաբերյալ ամենշաբաթյա օպերատիվ տվյալները։