ՏԵՍԱՆՅՈՒԹ.Կիևյան կամրջու եթե ասֆալտի մասով վերջում հարց ունեցանք, էլի գումար չենք տալու. Ավինյան

Երևանի քաղաքապետ Տիգրան Ավինյանը գործավարական նիստի ժամանակ  անդրադարձել է մայրաքաղաքում իրականացվող շինարարական աշխատանքների որակին:

Կապալառուները պետք է գիտակցեն, որ իրականացված մեծածավալ աշխատանքներից հետո ասֆալտապատումը պետք է լինի կատարյալ: Քաղաքապետի ձևակերպմամբ՝ կարիք չկա բազմիցս հիշեցնել թերությունները շտկելու մասին, քանի որ սկզբնական պահանջն է, որ վերջնակետում ապահովվի իդեալական հարթության ու որակի ասֆալտ: 

Տիգրան Ավինյանը նշել է, որ աշխատանքները դեռևս չեն ընդունվել, և կապալառուները շտկումներ անելու ժամանակ ունեն, սակայն այս մոտեցումը պետք է գրագետ կերպով փոխանցվի բոլորին, ինչը վերաբերում է նաև մնացած բոլոր աշխատանքներին: Որպես օրինակ նա մատնանշել է Կիևյան կամուրջը, որտեղ հսկայածավալ գործ է կատարվում և ներգրավված են լավ մասնագետներ: 

Քաղաքապետն ընդգծել է, որ եթե ավարտին ասֆալտի որակի հետ կապված խնդիրներ առաջանան, ապա ֆինանսավորում չի հատկացվի, քանի որ խորքային աշխատանքներից հետո վերջին, բայց ամենակարևոր դետալը պետք է լինի իդեալական: