Կիևը ՆԱՏՕ-ին ներքաշում է Ռուսաստանի դեմ ուղիղ զինված հակամարտության մեջ. Զախարովա

ՆԱՏՕ-ն՝ Կիևի հետ համատեղ, պատրաստվում է մշակել զենք՝ ռուսական ավիաբազաները, այդ թվում՝ երկրի խորքում գտնվողները, ոչնչացնելու համար, այս մասին հայտարարել է ՌԴ ԱԳՆ ներկայացուցիչ Մարիա Զախարովան:

«Մասնավորապես, խոսքը վերաբերում է այնպիսի սպառազինությունների ստեղծմանը, որոնք նախատեսված են Ռուսաստանի օդանավակայաններին և ավիաբազաներին զանգվածային հարվածներ հասցնելու և դրանք երկար ժամանակով շարքից հանելու համար, այդ թվում՝ Ռուսաստանի խորքային տարածքներում։ Իր հերթին Կիևի ռեժիմը շարունակում է փորձերը կյանքի կոչել վաղուց փայփայած նպատակը՝ ՆԱՏՕ-ին ներքաշել Ռուսաստանի դեմ ուղիղ զինված հակամարտության մեջ՝ իզուր հույս ունենալով այդ կերպ փրկել ռազմաճակատում իր ծանր իրավիճակը, ինչը ևս ակնհայտորեն պատկանում է ոչ իրատեսական պատկերացումների շարքին։ 

Հենց այս դիրքերից էլ Ռուսաստանը գնահատելու է ինչպես ներկայիս իրավիճակը, այնպես էլ դրա հետագա հնարավոր սրացման հեռանկարները»,- հայտարարել է ՌԴ ԱԳՆ ներկայացուցիչ Մարիա Զախարովան: