Հայաստանի առանձին շրջաններում սպասվում է կարճատև անձրև և ամպրոպ

Հայաստանի տարածքում և մայրաքաղաքում առաջիկա օրերին սպասվում են տեղումներ, իսկ օդի ջերմաստիճանն էապես չի փոխվի։

«Հիդրոօդերևութաբանության և մոնիթորինգի կենտրոն» ՊՈԱԿ-ից տեղեկացնում են, որ Երևանում հունիսի 25-ի երեկոյան ժամերին, 26-ի գիշերը, ինչպես նաև 27-ին՝ օրվա ընթացքում, ժամանակ առ ժամանակ կլինի կարճատև անձրև և ամպրոպ։ Ամպրոպների ընթացքում հնարավոր է քամու ուժգնացում, որի արագությունը կհասնի 15-18 մ/վ-ի։ Հունիսի 28-30-ն ընկած ժամանակահատվածում մայրաքաղաքում կհաստատվի առանց տեղումների եղանակ։

Հանրապետության տարածքում հունիսի 25-ի կեսօրից հետո, 26-ի գիշերն ու կեսօրից հետո, ինչպես նաև 28-ի գիշերն առանձին շրջաններում սպասվում է կարճատև անձրև և ամպրոպ։ Հունիսի 27-ին տեղումներ կլինեն շրջանների զգալի մասում, ընդ որում՝ այդ օրվա ցերեկն առանձին վայրերում անձրևները կլինեն հորդառատ, հնարավոր է նաև կարկուտ։ Հունիսի 28-ի ցերեկը, ինչպես նաև հունիսի 29-30-ին սպասվում է առանց տեղումների եղանակ։

Քամին կլինի հարավարևմտյան՝ 2-5 մ/վ արագությամբ, իսկ ամպրոպի ընթացքում սպասվում է քամու ուժգնացում՝ 17-20 մ/վ արագությամբ։ Օդի ջերմաստիճանի էական փոփոխություններ չեն կանխատեսվում։