Նոր սահմանափակումներ ու արգելքներ Ռուսաստանում․ ճգնաժամը խորանում է

Ռուսաստանի Դաշնության երեք շրջաններում՝ Կուրգանի, Կուրսկի և Բրյանսկի մարզերում, տեղական իշխանությունների որոշմամբ սահմանափակվել է ավտոմոբիլային վառելիքի իրացումը։ Բոլոր երեք նահանգներում արգելվել է բենզինի և դիզելային վառելիքի վաճառքը շարժական տարաներով (կանիիստրներով)։ Այս քայլով տեղական ղեկավարությունը փորձում է կանխել շուկայում արհեստական պակասուրդի առաջացումն ու բնակչության շրջանում նկատվող իրարանցումը։

Բացի տարաներով վաճառքի արգելքից, Կուրգանի մարզում ուժի մեջ են մտել նաև քանակային սահմանափակումներ։ Բնակավայրերի ներսում գտնվող լցակայաններում մեկ մեքենային թույլատրվում է բաց թողնել առավելագույնը 40 լիտր բենզին և 80 լիտր դիզվառելիք։ Միջպետական և միջշրջանային ճանապարհներին սահմանաչափը փոքր-ինչ այլ է՝ նույն 40 լիտր բենզինի դիմաց վարորդները կարող են գնել մինչև 200 լիտր դիզելային վառելիք։

Տարածաշրջանային իշխանությունները հայտնում են, որ խնդիրները մասամբ կապված են լոգիստիկայի հետ։ Մասնավորապես, Բրյանսկի մարզի ղեկավարությունը նշել է, որ սահմանամերձ շրջաններ վառելիքի տեղափոխումը բարդացել է անօդաչու թռչող սարքերի հնարավոր հարվածների վտանգի պատճառով, ինչն էլ հանգեցրել է գների որոշակի աճի։ Միևնույն ժամանակ, ընդհանուր պատկերը պայմանավորված է նաև հանրապետական միտումներով. հունիսի 15-ից 21-ն ընկած ժամանակահատվածում Ռուսաստանում բենզինի արտադրության ծավալները մոտ 25%-ով նվազել են նախորդ տարվա նույն ամսվա միջին ցուցանիշների համեմատ։

Շուկայում վերահսկողությունն ուժեղացնելու նպատակով ՌԴ դաշնային իշխանություններն արդեն իսկ արգելել են վառելիքի վերավաճառքը երկրում հանրահայտ էլեկտրոնային առևտրի հարթակներում, այդ թվում՝ Avito-ում, Ozon-ում և Wildberries-ում։