Վրաստանից արձագանքել են հայկական ապրանքների` Ռուսաստան վերարտահանման լուրերին

Վրաստանի շրջակա միջավայրի պաշտպանության և գյուղատնտեսության նախարարությունը հերքել է այն տեղեկությունը, թե հայկական արտադրանքն իբր Վրաստանի տարածքով այլ երկրների ապրանքների անվան տակ վերարտահանվում է Ռուսաստան։ Այս մասին հաղորդում է Business Грузия-ն։

Ինչպես հայտնել են գերատեսչությունից, նման հաղորդումներ հայտնվել են մի շարք հայկական լրատվամիջոցներում, թե հայկական ելակն իբր Վրաստանի տարածքով Ռուսաստան է մատակարարվում թուրքական արտադրանքի անվան տակ։

«Վրաստանի շրջակա միջավայրի պաշտպանության և գյուղատնտեսության նախարարությունը կտրականապես հերքում է հայկական հրատարակության հրապարակած տեղեկությունը՝ հայկական արտադրանքի ծագման փոփոխության և մեկ այլ հարևան երկրի անվան տակ բեռները Ռուսաստանի Դաշնություն վերարտահանելու վերաբերյալ։

Նախարարությունը նման տեղեկատվության տարածումը համարում է սպեկուլյատիվ։ Այն ոչ միայն չի համապատասխանում իրականությանը, այլև ստվեր է գցում մեր երկրների միջև տնտեսական հարաբերությունների վրա։

Մենք խորը մտահոգություն ենք հայտնում հարևան երկրում քաղաքական պայքարի նման կոպիտ ձևերի կապակցությամբ, որոնց մեջ մեր երկիրը ներքաշվում է անհիմն մեթոդներով», — ասված է գերատեսչության հայտարարության մեջ։