ՀՀ վերջին ընտրությունները չենք համարում ժողովրդավարական․ Զատուլին

Մենք ոչ մի դեպքում չենք կարող ՀՀ վերջին ընտրությունները համարել ժողովրդավարական: Նման հայտարարություն է արել ՌԴ Պետդումայի ԱՊՀ գործերով կոմիտեի նախագահի առաջին տեղակալ, ԱՊՀ երկրների ռուսական ինստիտուտի տնօրեն Կոնստանտին Զատուլինը՝ խոսելով ՀՀ խորհրդարանական ընտրություններից.

«Բայց քանի որ մենք դաշինքների մեջ ենք Հայաստանի հետ և ավանդաբար զարգացրել ենք կապեր, մենք կշարունակենք աշխատել Հայաստանի հետ՝ հիմնվելով այն փաստի վրա, որ ներկայումս երկիրը ղեկավարում են մարդիկ, ովքեր իշխանության են մնացել անարդար, ոչ ժողովրդավարական ընտրությունների արդյունքում»,-ասել է նա։ 

Նրա խոսքով՝ Հայաստանը կշարունակի Ռուսաստանից հեռանալու և Արևմուտքի հետ մերձեցման քաղաքականությունը։ 

«Մոսկվան պետք է սկզբունքային դիրքորոշում որդեգրի։ Իմ կարծիքով՝ այդ սկզբունքայնությունը պետք է արտահայտվի նրանով, որ մենք որևէ դեպքում չենք կարող անցկացված ընտրությունները համարել ժողովրդավարական և ընդունված չափանիշներին համապատասխան։ Չենք կարող, որովհետև հավասար ընտրապայքարի պայմաններ չեն ապահովվել։ Ընդհակառակը, կիրառվել են ճնշումներ, որոնք շարունակվում և խորանում են նաև ընտրություններից հետո՝ ընդդիմադիր ուժերի և նրանց առաջնորդների նկատմամբ»,–ասել է Զատուլինը: