Ուկրաինայի ԱԳՆ-ի աղմկահարույց հայտարարությունը՝ կենսաբանական զենքի կիրառման վերաբերյալ

Ուկրաինայի ԱԳՆ-ն հերքել է կենսաբանական զենքի ստեղծումը: 

«Ուկրաինան երբևէ չի զբաղվել կենսաբանական զենքի մշակմամբ կամ պահեստավորմամբ և լիովին կատարում է իր միջազգային պարտավորությունները»,- հրապարակել է  Ուկրաինայի ԱԳՆ 

Պաշտոնական Կիևը հայտարարել է կենսաբանական զենքի արգելման մասին միջազգային կոնվենցիայի դրույթներին հավատարիմ մնալու մասին։ Ուկրաինայի արտաքին գործերի նախարարությունը հրապարակված մեկնաբանությամբ ընդգծել է, որ երկիրը երբևէ չի մասնակցել նմանատիպ զինատեսակների մշակման, արտադրության կամ պաշարների ստեղծման գործընթացներին։

Գերատեսչության փոխանցմամբ՝ Ամերիկայի Միացյալ Նահանգների հետ կենսաանվտանգության ոլորտում իրականացվող բազմամյա փոխգործակցությունն ունի բացառապես խաղաղ բնույթ։ Այն ուղղված է հանրային առողջապահության համակարգի հզորացմանը, համաճարակաբանական հսկողությանը, ինչպես նաև լաբորատոր ախտորոշման բարելավմանը։

ԱԳՆ հայտարարության մեջ նշվում է, որ համատեղ ծրագրերին մասնակցող բոլոր ուկրաինական լաբորատորիաները գործում են միայն քաղաքացիական տիրույթում։ Դրանք գիտական, ախտորոշիչ կամ ռեֆերենս կենտրոններ են, որոնք ներառված են անասնաբուժության ու հանրային առողջապահության համակարգերում և որևէ առնչություն չունեն ռազմական նպատակների հետ։