Կամաց–կամաց սկսվում է. Պապոյանը` ԵՄ ապրանքների արտահանման մասին

Էկոնոմիկայի նախարար Գևորգ Պապոյանը ԱԺ–ում լրագրողների հետ ճեպազրույցում ԵՄ ապրանք արտահանող տնտեսվարողներին տրվող փոխհատուցման հստակ նիշ չասաց, սակայն հիշեցրեց, որ փոխհատուցման բանաձևը պատրաստ է։

Ավելի վաղ հայտնել էինք, որ ՀՀ կառավարությունը կսուբսիդավորի ջերմատնային ապրանքների արտահանումը։ Ըստ Պապոյանի՝ կսուբսիդավորվեն տրանսպորտային ծախսերը, մաքսատուրքը։

«Այնքան, ինչքան կարտահանեն, բանաձևը դրված է, սահմաններ չկան, քանի որ ասում ենք՝ այնքան, ինչքան կարտահանեն»,– ասաց Պապոյանը։

Հարցին՝ բացի ծաղիկների 10 հազար խմբաքանակից, այլ ապրանքներ արտահանվե՞լ են ԵՄ, Պապոյանը դրական պատասխան տվեց, սակայն կրկին չհստակեցրեց՝ ինչ ապրանքների մասին է խոսքը։ Փոխարենը Պապոյանը հայտարարեց, որ ծաղկի խմբաքանակ ուղարկվել է նաև ցամաքային ճանապարհով։

«Հայաստան–Վրաստան–Թուրքիա–Բուլղարիա–Ռումինիա–Ուկրաինա՝ բեռնատարով։ Նկատի ունեմ՝ կամաց–կամաց սկսվում է»,– նշեց նախարարը։

Ինչ վերաբերում է պտուղ–բանջարեղենի արտահանմանը, նախարարը հայտարարեց, թե այս պահին որոշ ընկերություններ կան, որ աշխատում են Հունաստան արտահանման ուղղությամբ, կա պայմանավորվածություն, տեխնիկական հարցեր են մնացել։