Գագիկ Ծառուկյանը պատասխանել է Փաշինյանի հայտարարություններին․ Ռուսաստանի հետ տնտեսական պատերազմ բերեցիք

Տնտեսությունը չի լինում, ասենք թե, իշխանական կամ ընդդիմադիր։ Տնտեսությունը չի լինում ռուսամետ կամ արևմտամետ։ Տնտեսությունը կամ զարգանում է, աշխատում է, կամ միանգամից քանդվում, տրաքում է։  Այսօր Վանաձորում քարոզարշավի ընթացքում հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը՝ անդրադառնալով Ռուսաստանի, ԵԱՏՄ-ի և Հայաստանի շուրջ ծավալվող զարգացումներին։

Նրա խոսքով՝ տնտեսությունը քանդման եզրին է կանգնած։

 «Էնքան ասեցին խաղաղություն, որ տնտեսական պատերազմ բերեցին Ռուսաստանի հետ: Ժողովրդին ո՞վ է պահելու, ո՞վ է կերակրելու, վարկերն ո՞վ է փակելու։ Մարդկանց ունեցվածքը լրիվ կորցնելու են։ Խոսում են դատարկ-դատարկ՝ «մենք այլընտրանքներ ունենք»։ Այլընտրանք ունեցողը՝ սա փակվեց, մյուսն է բացում, բայց նրանք 10 տարի չեն կարող բացել, որովհետև տնտեսության հիմնական շարժը, առևտուրը, պահանջարկը՝ տարիներ է պետք, որ ծանոթանան ապրանքի հետ, պայմանագրեր կապեն»,- նշել է նա՝ հավելելով, որ դեռ ուշ չէ և քայլ պետք է անել իրավիճակը շտկելու ուղղությամբ։