ՏԵՍԱՆՅՈՒԹ․ Հրկիզված մեքենաներ, թալանված խանութներ․ Փարիզում զանգվածային անկարգություններ են

Չեմպիոնների լիգայում փարիզյան «Պարի Սեն Ժերմեն» (ՊՍԺ) ակումբի հաղթանակից հետո Ֆրանսիայի մի շարք քաղաքներում, այդ թվում՝ մայրաքաղաք Փարիզում, զանգվածային անկարգություններ և բախումներ են տեղի ունեցել։ Ֆուտբոլային երկրպագուները դուրս են եկել փողոցներ, ինչից հետո իրավիճակը վերահսկողությունից դուրս է եկել։

Ինչպես հայտնում է տեղական Le Figaro պարբերականը՝ հղում անելով երկրի ներքին գործերի նախարարությանը, իրավապահ մարմինների և անկարգությունների մասնակիցների միջև ֆիզիկական բախումներ են գրանցվել։ Ցուցարարները հրկիզել են փողոցներում կայանված մեքենաները, ինչպես նաև վնասել ու թալանել են մի շարք առևտրի կետեր և խանութներ։

Ոստիկանության իրականացրած հատուկ գործողությունների արդյունքում ողջ երկրի տարածքում բերման է ենթարկվել ու ձերբակալվել ավելի քան 400 քաղաքացի։ Բախումների հետևանքով կան նաև տուժածներ. նվազագույնը 12 մարդ հոսպիտալացվել է տարբեր աստիճանի մարմնական վնասվածքներով։ Հիվանդանոց տեղափոխվածների թվում կան իրավապահներ, որոնցից երեքի առողջական վիճակը բժիշկները գնահատում են ծանր։