Լուկաշենկոն սպառնում է Հայաստանին․ հայ ժողովուրդը պետք է զգույշ լինի, որպեսզի չկրկնի Ուկրաինայի ճակատագիրը

Բելառուսի նախագահ Ալեքսանդր Լուկաշենկոն հայտարարել է, որ Եվրասիական տնտեսական միության և Եվրամիության միջև ընտրություն կատարելիս պետք է հաշվի առնվի Հայաստանի ժողովրդի կամքը: Ռուս լրագրող Պավել Զարուբինի հետ զրույցում նա նշել է, որ նման քայլի դիմելուց առաջ անհրաժեշտ է հաշվի առնել հասարակության կարծիքը՝ հավելելով, որ իրենք կընդունեն ժողովրդի ցանկացած որոշում:

Լուկաշենկոյի խոսքով՝ արտաքին քաղաքականության վեկտորի փոփոխության հարցում հայ հասարակությունը պետք է ծանրակշիռ մոտեցում ցուցաբերի՝ հնարավոր բացասական զարգացումներից խուսափելու համար: Նա նաև ուշադրություն է հրավիրել այն հանգամանքին, որ Երևան այցելած եվրոպացի քաղաքական գործիչները Հայաստանի իշխանություններին որևէ հստակ խոստում չեն տվել:

«Հայ ժողովուրդը պետք է զգույշ լինի Ռուսաստանի և Եվրոպայի միջև ընտրություն կատարելիս, որպեսզի չկրկնի Ուկրաինայի ճակատագիրը»,- ասել է  Բելառուսի նախագահ Ալեքսանդր Լուկաշենկոն։

Հայաստանի և Եվրամիության հարաբերությունների մերձեցման գործընթացը նոր փուլ է թևակոխել 2025 թվականին, երբ կողմերը ստորագրեցին ԵՄ-ին անդամակցելու գործընթացի մեկնարկի վերաբերյալ համապատասխան փաստաթուղթը։ Այս քայլը փորձագիտական շրջանակներում քննարկումների տեղիք է տվել, հատկապես երկրի տնտեսության վրա հնարավոր ազդեցության և Ռուսաստանի հետ հարաբերությունների համատեքստում:

Ներկայումս Հայաստանը շարունակում է մնալ ԵԱՏՄ անդամ, սակայն ինտեգրացիոն գործընթացների շուրջ քննարկումներն ավելի են ակտիվացել 2026 թվականին՝ Ղազախստանում կայանալիք Եվրասիական տնտեսական միության գագաթնաժողովին ընդառաջ: