ՀՀ պաշտոնական դիրքորոշումը՝ Ռուսաստան ապրանքների ներմուծման սահմանափակումների վերաբերյալ

Հայաստանը հույս ունի, որ Ռուսաստան ապրանքների ներմուծման հետ կապված խնդիրները տեխնիկական բնույթի են և շուտով կլուծվեն: Այս մասին  «Վեստի» հաղորդման ժամանակ Պավել Զարուբինին տված հարցազրույցում հայտնել է ՀՀ փոխվարչապետ Մհեր Գրիգորյանը՝ անդրադառնալով երկկողմ առևտրաշրջանառության վերջին զարգացումներին:

Փոխվարչապետի խոսքով՝ ներկա փուլում երկու երկրների միջև առևտրային ցուցանիշների վերաբերյալ վերջնական վերլուծություններ կամ հետևություններ անելը դեռևս վաղ է: Նա լիահույս է, որ հայկական արտադրանքի տեղաշարժի հետ կապված ընթացիկ բարդությունները ժամանակավոր են և արագ կհարթվեն։

Հիշեցնենք, որ մայիսի 30-ին ռուսական կողմը սահմանափակել է Հայաստանից լոլիկի, վարունգի և ելակի ներմուծումը: Ըստ «Ռոսսելխոզնադզոր»-ի տարածած հայտարարության՝ որոշումը պայմանավորված է մատակարարումների ընթացքում արձանագրված պարբերական խախտումներով և նպատակ ունի ապահովել երկրի ներքին շուկայի ֆիտոսանիտարական անվտանգությունը:

Բացի այդ, մայիսի կեսերին ռուսական գերատեսչությունը ստուգումներ էր սկսել հայաստանյան մի շարք ձեռնարկություններում, որոնցից ձկնամթերքի արտահանումը կասեցվել էր՝ եվրոպական ծագման կեղծված ապրանքների հնարավոր ներկրման կասկածանքով: Ռուսական պատվիրակության տեսչական ստուգումները Հայաստանում մեկնարկել էին մայիսի 21-ին և ավարտվել մայիսի 27-ին: