Կրեմլից ապատեղեկատվության աննախադեպ հոսք. Փաշինյանի կեղծ հիվանդությունը. The Insider

Հայաստանում հունիսի 7-ին կայանալիք խորհրդարանական ընտրությունների նախաշեմին երկիրը բախվել է Կրեմլի կողմից ապատեղեկատվության աննախադեպ հոսքի։ Այս մասին հայտնում է «The Insider»-ը:

«The Insider»-ը պարզել է, թե ով է ստեղծում այդ ֆեյքերը, և ի թիվս այլ հայտնաբերումների, բացահայտել է, որ Հայաստանում հայտնի քարոզչական «Wyomig Star» թերթի հետևում կանգնած է Ազգային անվտանգության ծառայության (FCB) հետ կապված պրոֆեսիոնալ մատնիչ Ալեքսանդր Իոնովը, իսկ համացանցային ֆեյքերի համակարգման համար, ի թիվս այլոց, պատասխանատու է Սոցիալական նախագծման գործակալության (ԱՍՊ՝ Նախագահի աշխատակազմի կապալառու) քաղտեխնոլոգ Անդրեյ Պերլան, ում նախկինում բռնացրել էին Եվրոպայում, ԱՄՆ-ում և նույնիսկ Լատինական Ամերիկայում ապատեղեկատվական արշավներ իրականացնելիս։

«Աստղագուշակները նախազգուշացնում են 2026 թվականի հունիսի կեսերից մինչև հուլիսի կեսերը «պայթյունավտանգ անկայունության» ժամանակաշրջանի մասին։ Այդ ընթացքում, նրանց հաշվարկներով, տարանցիկ Յուպիտերը կհայտնվի Փաշինյանի նատալ Ուրանի քառակուսու մեջ։ Դա հաճախ խոստանում է հանկարծակի բացահայտումներ, զանգվածային հուզումներ և իրադարձություններ, որոնք կարող են «զրոյացնել» բոլոր ձեռքբերումները»։ Հայաստանում խորհրդարանական ընտրություններից մեկ ամիս առաջ նման նյութ է հրապարակել «երևան․ուան» պորտալը՝ Մոսկվայում գրանցված մի լրատվամիջոց, որն իբր ուղղված է Ռուսաստանում բնակվող հայերին։ Այս հրապարակումից չորս ամիս առաջ Սոցիալական նախագծման գործակալության (ԱՍՊ) գրասենյակից ՌԴ նախագահի գործերի վարչություն ուղարկված զեկույցում հաշվետվություն է ներկայացվել․ «Նախագիծ՝ Երևան Առաջին։ Գործարկվել է լիցենզավորված ԼՀԿ կայքը։ Ամսական նախագծային ցուցանիշները՝ 200 լոնգրիդ, 200 նորություն, 500 պատկերազարդում, 10 տեսանյութ։ Սոցիալական ցանցերում:

Իլյա Գամբաշիձեի կողմից ստեղծված ԱՍՊ-ն Կրեմլի գլխավոր կապալառուն է ֆեյքերի արտադրության ոլորտում, որն առաջին պլան է մղվել Պրիգոժինի սպանությունից և նրա տրոլների ֆաբրիկայի լուծարումից հետո։ Նիկոլ Փաշինյանի համար աստղագուշակական կանխատեսումը, որը հորինել են «Երևան Առաջին»-ի հեղինակները, ԱՍՊ-ի գրագիրների առաջին նմանատիպ փորձարկումը չէ․ ոչ աուտենտիկ հրատարակություններում բովանդակության արտադրության մեջ աստղագուշակների ներգրավել նրանք սկսել են դեռևս 2023 թվականին՝ կեղծ լրատվամիջոցների արշավի շրջանակներում, որն արևմտյան լրագրողներն անվանել են Դոպելգանգեր (երկվորյակ)։ Բուն ԱՍՊ-ում այս արշավն անցնում է ՖԳԻԱ հապավմամբ (սկզբնական թիրախային երկրներից՝ Ֆրանսիա, Իսրայել, Գերմանիա, Ամերիկա), սակայն, ինչպես ցույց են տալիս ԱՍՊ-ի ներքին փաստաթղթերը, նախագծի աշխատակիցներն արդեն սովորել են այն անվանմանը, որով իրենց կոչում են լրագրողները։ Մոսկվացի աստղագուշակ Վերա Զադորոշչենկոյի հեղինակած կանխատեսումը Փաշինյանի համար ԱՍՊ-ի սերվերներում էր գտնվում դեռևս 2025 թվականի կեսերից։ «05․01․2026-ից <․․․> Պլուտոնի դրական տարանցիկ ասպեկտը Արևին։ Փաշինյանի կամքի ուժն ու հավակնությունները աջակցություն են ստանում շատ ազդեցիկ կառույցների, էլիտաների և «ստվերային խաղացողների» կողմից»,— ասվում է փաստաթղթում, որին ծանոթացել է ««The Insider»-ը։

«Սթորմ-1516». Կեղծ լուրեր Փաշինյանի հիվանդության մասին

Թեև հավաստիորեն հայտնի չէ, թե հատկապես ով է կանգնած «Սթորմ-1516» արշավի հետևում, հայտնի է, որ այն սերտորեն կապված է այսպես կոչված Բռնաճնշումների դեմ պայքարի հիմնադրամի հետ, որը հիմնադրվել է Պրիգոժինի կողմից 2021 թվականին։ Հիմնադրամի նյութերը երբեմն տարածում էին «Դոպելգանգեր» ցանցի կայքերն ու հաշիվները, սակայն, ինչպես ենթադրում է թվային օտարերկրյա միջամտության դեմ պայքարի ֆրանսիական «Վիժինում» գործակալությունը, դա տեղի էր ունենում ավելի շուտ իրավիճակային առումով։ Իր աշխատանքի մեկնարկի պահից ի վեր «Սթորմ-1516»-ը կողմնորոշված է Ուկրաինայի վարկաբեկմանը, ԱՄՆ-ի, Ֆրանսիայի, Գերմանիայի և Մոլդովայի ընտրությունների թեկնածուների մասին կեղծիքների տարածմանը։

Նիկոլ Փաշինյանի դեմ «Սթորմ-1516» նախագծի արշավը սկսվել է 2025 թվականի հունիս-հուլիսին, սակայն մինչև սեպտեմբեր խմբի ջանքերի մեծ մասը կենտրոնացված էր Մոլդովայի ընտրություններից առաջ կեղծիքների տարածման վրա։ Մոլդովայում եվրոպամետ «Գործողություն և համերաշխություն» (ԳՀ/ՊԱՍ) կուսակցության հաղթանակից հետո «Սթորմ-1516» խմբավորումը անցավ Փաշինյանին։ Մարսելում անշարժ գույքի մասին հենց այն կեղծիքը, որը կրեմլյան պատվիրատուին ներկայացված զեկույցում անվանում էին «հաջողություն» և որի կապակցությամբ պարծենում էին «հանրային փոխհրաձգությամբ», գործարկվել էր հենց «Սթորմ-1516»-ի կողմից։ Եվրամիության Արտաքին գործողությունների ծառայության զեկույցում հետազոտողները մատնանշում են Մոլդովայում և Հայաստանում «Սթորմ-1516»-ի նարատիվների նմանությունը. և՛ մեկ, և՛ մյուս դեպքում կեղծ կայքերն ու ոչ աուտենտիկ հաշիվները քննարկում են Կրեմլին ընդդիմադիր թեկնածուների անբարոյականությունը, հորինում են կոռուպցիոն պատմություններ, շահարկում են ինքնիշխանության կորստի և թե՛ Մայա Սանդուի, թե՛ Նիկոլ Փաշինյանի կողմից արևմտյան շահերի պաշտպանության թեման։

Մայիսին խմբավորման հետ կապված հաշիվները սկսեցին լուրեր տարածել այն մասին, թե Փաշինյանը հիվանդ է։ Այդպիսի տեսանյութերից մեկում, որը կեղծված էր հայկական «ՍիվիլՆեթ» պորտալի ոճով, ասվում է, որ Նիկոլ Փաշինյանը վարակվել է ՄԻԱՎ-ով, ինչի մասին հայտնի է դարձել 2010 թվականին նրա բանտարկության ժամանակ, երբ նա դատապարտված էր յոթ տարվա ազատազրկման՝ անկարգություններ կազմակերպելու մեղադրանքով։ Սակայն լրատվամիջոցի խմբագրությունը հերքել է նման ռեպորտաժի հրապարակումը։

Ավելի մանրամասն` սկզբնաղբյուրում: