Մոսվկայի ուլտիմատումը հայ ժողովրդին. Ինչ է թաքնված Մեդվեդևի հայտարարության հետևում

Դմիտրի Մեդվեդևի հայտարարությունը հայ-ռուսական հարաբերությունների ներկա ճգնաժամի համատեքստում կարելի է որակել որպես դասական քաղաքական ուլտիմատում և բացահայտ «կարմիր գծերի» գծում: Մոսկվան այս հայտարարությամբ ուղղակիորեն մերժում է Նիկոլ Փաշինյանի կառավարության լեգիտիմությունը՝ որպես բանակցային կողմ, և հարաբերությունների ապագա զարգացումը պայմանավորում բացառապես Հայաստանում «կոնստրուկտիվ» իշխանության առկայությամբ, ինչը իշխանափոխության հստակ պահանջ է:

Ավելին, Հայաստանի ապագայի համեմատությունը «բանդերական Ուկրաինայի աղետալի ուղու» հետ ամենակոշտ աշխարհաքաղաքական սպառնալիքն է, որով Մոսկվան հասկացնում է, որ արտաքին քաղաքական վեկտորի փոփոխության և Արևմուտքի հետ մերձեցման փորձերը կարող են հանգեցնել պետականության կորստի, տարածքային կորուստների և պատերազմի:

Միևնույն ժամանակ, տարանջատում դնելով «Հայաստանի ժողովրդի» և «ղեկավարության» միջև և նշելով, որ ընտրությունը ժողովրդինն է, Ռուսաստանը կիրառում է հիբրիդային ազդեցության մեթոդ՝ փորձելով հայաստանյան հասարակության ներսում ներքաղաքական դիմակայություն և պառակտում հրահրել:

Այսպիսով, սա սովորական քննադատություն չէ, այլ ձևակերպված վերջնագիր. Մոսկվան առաջադրում է պայման (փոխել կամ կտրուկ փոխակերպել իշխանությունը) և մատնանշում դրա չկատարման աղետալի հետևանքները՝ ցույց տալով, որ Հայաստանի անվտանգային դիվերսիֆիկացումն իր համար անընդունելի է:

Հիշեցնենք, որ այսօր Ռիա-նովոստի գործակալությանը տված հարցազրույցում Մեդվեդևը հայտարարել է, Նիկոլ Փաշինյանը Հայաստանը մղում է բանդերական Ուկրաինայի աղետալի ուղիով, նշելով, որ դա չափազանց վտանգավոր է: Նա նաև ասել է, որ Փաշինյանը, չնայած ԵԱՏՄ-ից ստացվող օգուտներին, հրաժարվել է մասնակցել միության գագաթնաժողովներին և Երևանում հավաքում է «Ռուսաստանի գարշելի թշնամիներին»։