Մոսկվայից շոկային ուղերձ՝ Երևանին․ ինչ զարգացումներ են սպասվում

Ռուսաստանի անասնաբուժական և բուսասանիտարական վերահսկողության դաշնային ծառայությունը («Ռոսսելխոզնադզոր») մայիսի 22-ից ժամանակավորապես արգելել է Հայաստանից թարմ կտրած ծաղիկների ներմուծումը երկրի տարածք։ Այս որոշման մասին գերատեսչությունը պաշտոնական նամակով տեղեկացրել է Հայաստանի համապատասխան պատասխանատու մարմնին։ Ռուսական կողմը սահմանափակումը հիմնավորում է արտադրանքում կարանտինային վնասատուների հաճախակի հայտնաբերմամբ։

Ըստ հրապարակված տվյալների՝ 2026 թվականի սկզբից ի վեր Հայաստանից Ռուսաստան է արտահանվել շուրջ 39 միլիոն հատ կտրած ծաղիկ։ Այդ խմբաքանակներում ռուսական կողմն արձանագրել է կարանտինային օբյեկտների հայտնաբերման 135 դեպք։ Մասնավորապես, 133 դեպքում հայտնաբերվել է արևմտյան ծաղկային (կալիֆորնիական) տրիպս, իսկ մնացած երկու դեպքերում՝ կիտրոնային սև և ծխախոտի սպիտակաթևիկներ։ «Ռոսսելխոզնադզորը» նամակում մտահոգություն է հայտնել և նշել, որ սա վկայում է հայկական կողմից իրականացվող ոչ բավարար հսկողության մասին։

Ռուսական գերատեսչությունն ընդգծում է, որ արևմտյան ծաղկային տրիպսը համարվում է ԵԱՏՄ անդամ պետությունների համար վտանգավոր կարանտինային վնասատու, որն առավել մեծ սպառնալիք է ներկայացնում ջերմոցային տնտեսությունների համար։ Այն ոչ միայն փչացնում է բույսերն ու նվազեցնում բերքատվությունը, այլև հանդիսանում է տարբեր վիրուսային հիվանդությունների տարածող, ինչը կարող է հանգեցնել գյուղատնտեսական մշակաբույսերի զգալի կորուստների կամ ամբողջական ոչնչացման։