Վարչապետը սպառնացել է՝ սպանելու է ինձ․ Քոչարյան

Սովորաբար նորմալ երկրներում, նորմալ կառավարությունները փորձում են օրինակ ծառայել, թե ինչպիսին պետք է լինի քաղաքական պրոցեսը, քարոզարշավը։ Այս մասին «Հայաստան» դաշինքի քարոզարշավի ընթացքում ասել է ՀՀ երկրորդ նախագահ Ռոբերտ Քոչարյանը՝ անդրադառնալով Նիկոլ Փաշինյանի խոսույթին։

«Եվ Ի՞նչ ենք մենք տեսնում Հայաստանում, երևի միակ երկիրն է կամ եզակի երկրներից մեկը, որտեղ կառավարությունը ոչ թե լավագույն ստանդարտներին է փորձում ձգտել, այլ ինքը հենց ներդնում է վատագույն ստանդարտները՝ լաչառություն, ֆեյք նորություններ և այն, ինչը տեսնում եք՝ մարդկանց հետ խոսելու ոճ, մարդկանց հայհոյել, սպառնալ։ Մի երկու-երեք օր առաջ վարչապետը սպառնաց, որ սպանելու է ինձ և ևս երկու ընդդիմադիր ուժերի առաջնորդներին»,- ասել է նա։

ՀՀ երկրորդ նախագահ Ռոբերտ Քոչարյանն անդրադարձավ նաև «Հայաստան» դաշինքի ամենակարևոր կետերից մեկին՝ անվտանգությունը։

«Կառավարությունը ստեղծում է մի իրավիճակ, երբ Հայաստանի անվտանգությունը պետք է կախված լինի մեկ մարդուց, կոնկրետ՝ Իլհամ Ալիևից։ Եթե համարում ենք, որ Ադրբեջանի նախագահը գիշեր-ցերեկ չի քնում, մտածում է մեր անվտանգության մասին, ապա խստագույնս սխալվում ենք»,- նշել է  ՀՀ երկրորդ նախագահ Ռոբերտ Քոչարյանը։