Ռուսաստանից զգուշացնում են Հայաստանին. միջամտություն կլինի

Ռուսաստանի արտաքին գործերի նախարարությունը հայտարարել է, որ Եվրամիությունը մտադիր է միջամտել Հայաստանի խորհրդարանական ընտրություններին՝ կիրառելով Մոլդովայում փորձարկված տեխնոլոգիաները։

 «Դրա համար Եվրամիությունը կգործադրի Մոլդովայի նախորդ նախընտրական քարոզարշավների ժամանակ մշակված մեխանիզմներն ու տեխնոլոգիաները», - նշված է նախարարության մեկնաբանության մեջ, որը մեջբերում է «Իզվեստիա» թերթը։

Ըստ գերատեսչության պարզաբանման՝ միջամտության փորձի մասին է վկայում երկիր ԵՄ գործընկերային առաքելության և «հիբրիդային սպառնալիքների դեմ պայքարի» խմբի ուղարկումը։ Նախարարությունում նաև հիշեցրել են, որ Բրյուսելի մոտ «ամեն ինչ իր գինն ունի», իսկ Արևմուտքի հետ խաղերը հազվադեպ են բարենպաստ ավարտ ունենում։

«Ռուսական դիրքորոշումը պարզ է և ազնիվ. մենք շահագրգռված ենք հզոր, կայուն և իսկապես ինքնիշխան Հայաստանով, որն ի վիճակի է ինքնուրույն կառուցել իր քաղաքականությունը և որոշել իր զարգացման վեկտորը», - ընդգծել են ՌԴ ԱԳՆ-ում։

Հավելենք` Հայաստանում խորհրդարանական ընտրությունները նախատեսված են հունիսի 7-ին։ 

ՌԴ ԱԳՆ-ն նշում է`  Ռուսաստանում և Մերձդնեստրի Մոլդովական Հանրապետությունում տեղամասերի քանակը կրճատվել էր՝ ընդդիմությանն աջակցելու հնարավորությունը սահմանափակելու նպատակով, մինչդեռ Եվրոպայում դրանց թիվը զգալիորեն ավելացվել էր՝ սփյուռքի ձայները ստանալու ակնկալիքով։

Եվրաինտեգրման և Ռուսաստանից հեռանալու կողմնակից Մայա Սանդուի համակիրների կուսակցությանը հաջողվել էր հաղթել արտերկրի տեղամասերի ձայների 78,61 տոկոսի շնորհիվ, որտեղ ընդդիմությունը ստացել էր 17,73 տոկոս։ Միևնույն ժամանակ, երկրի ներսում պատկերը հակառակն էր՝ համապատասխանաբար 44,13 և 49,54 տոկոս ձայներ։