Իրանի պաշտոնյաները հանդես են եկել միասնական ուղերձով

Իրանի ղեկավարությունը հանդես է եկել համատեղ հայտարարությամբ՝ ընդգծելով ազգի և կառավարության միասնությունը։
 

Իրանի բարձրաստիճան պաշտոնյաների սոցիալական ցանցերում գրեթե միաժամանակ հրապարակվել է իմաստով նույնական ուղերձ։

 
 «Իրանում չկան ո՛չ արմատականներ, ո՛չ չափավորներ. մենք բոլորս «իրանցիներ» ենք և «հեղափոխականներ», և շնորհիվ ազգի ու կառավարության երկաթյա միասնության, հեղափոխության գերագույն առաջնորդին լիակատար ենթարկվելով, մենք կստիպենք ագրեսորին զղջալ իր արարքների համար»,- ասված է X-ի հայտարարության մեջ, որը զետեղել են Իրանի նախագահ Մասուդ Փեզեշքիանը և խորհրդարանի խոսնակ Մոհամմադ Բաղեր Ղալիբաֆը։
 

 Նրանք շեշտել են. «Մեկ Աստված, մեկ ազգ, մեկ առաջնորդ և մեկ ուղի. այդ ուղին մեր սիրելի Իրանի հաղթանակի ուղին է, որն ավելի թանկ է, քան կյանքը»։

Արտաքին գործերի նախարար Աբբաս Արաղչին նույնպես X-ում նշել է, որ պետական ինստիտուտները հանդես են գալիս միասնական ճակատով։


«Մարտի դաշտը և դիվանագիտությունը լիովին համակարգված ճակատներ են միևնույն պատերազմում»,- վստահեցրել է նախարարը՝ հավելելով, որ իրանցիներն այսօր առավել միասնական են։

The Wall Street Journal-ը նախկինում գրել էր, որ Հորմուզի նեղուցի բացման վերաբերյալ Արաղչիի հաղորդագրությունից հետո Իսլամական հեղափոխության պահապանների կորպուսը (ԻՀՊԿ) բողոք էր հայտնել՝ նշելով, թե չեն ենթարկվելու «ինչ-որ հիմարի թվիթերին»։ Ըստ հրատարակության՝ այս հակամարտությունը ի հայտ էր բերում Իրանի ներքին պառակտումը։