Թրամփը` Իրանի հետ զինադադարի երկարաձգման մասին

ԱՄՆ նախագահ Դոնալդ Թրամփը հայտարարել  է Իրանի հետ հրադադարի ռեժիմի երկարաձգման մասին, ինչը, նրա խոսքով, պայմանավորված է Պակիստանի ղեկավարության ներկայացրած խնդրանքով։

Համապատասխան գրառումը նա կատարել է ապրիլի 22-ի գիշերը՝ այն պահին, երբ լրանում էր ապրիլի 8-ին հաստատված հրադադարի վերջնաժամկետը։

 
Թրամփի խոսքով իրեն են դիմել Պակիստանի զինված ուժերի հրամանատարը և վարչապետ Շահբազ Շարիֆը, որոնք խնդրել են կասեցնել հարձակումը Իրանի վրա այնքան ժամանակ, քանի դեռ նրանց առաջնորդներն ու ներկայացուցիչները չեն մշակել միասնական առաջարկ:

Ըստ Միացյալ Նահանգների նախագահի՝ հրադադարը ուժի մեջ կմնա այնքան ժամանակ, մինչև կողմերը հանդես գան առաջարկով և ավարտվեն բանակցությունները։ Դրա հետ մեկտեղ Թրամփն ընդգծել է, որ ամերիկյան զինված ուժերին հրահանգել է չդադարեցնել Հորմուզի նեղուցի շրջափակումը և բոլոր ուղղություններով պահպանել մարտունակ վիճակը։