Մելոնին արձագանքել է Վլադիմիր Սոլովյովի վիրավորանքներին

Իտալիայի վարչապետ Ջորջա Մելոնին հրապարակավ պատասխանել է ռուսաստանցի հեռուստահաղորդավար Վլադիմիր Սոլովյովի կողմից իր հասցեին հնչեցված բազմաթիվ վիրավորանքներին։ Իտալական կառավարության ղեկավարը հայտարարել է, որ իր քաղաքական ուժը գործում է բացառապես սեփական երկրի շահերից ելնելով և զերծ է արտաքին ազդեցություններից։

Մելոնիի խոսքով՝ ի տարբերություն այլ քաղաքական գործիչների, իրենց ոչ ոք չի կառավարում, և նրանք չունեն «տերեր», որոնք կարող են հրամաններ արձակել։ Վարչապետը հավելել է, որ իր գործունեության միակ կողմնորոշիչը եղել և մնում է Իտալիայի պետական շահը։ Այս հայտարարությունը հաջորդել է ռուսական հեռուստաեթերով հնչած կոշտ ձևակերպումներին, որտեղ Սոլովյովը Մելոնիին անվանել էր «դավաճան» և օգտագործել այլ վիրավորական մակդիրներ։

Հիշեցնենք՝ միջադեպի կապակցությամբ Իտալիայի արտաքին գործերի նախարարությունը պարզաբանումների համար կանչել է Իտալիայում Ռուսաստանի դեսպանին։ Իտալացի գործիչները համերաշխություն են հայտնել վարչապետին՝ դատապարտելով հաղորդավարի հռետորաբանությունը։ 

Հարկ է նշել, որ Վլադիմիր Սոլովյովը գտնվում է Եվրամիության պատժամիջոցների ներքո, ինչի հետևանքով Իտալիայի իշխանությունները նախկինում բռնագրավել էին Կոմո լճի ափին գտնվող նրա առանձնատունը։