Ինչու է արգելվել ձախ շրջադարձը Հովսեփ Էմինի փողոցում. պարզաբանում

Հովսեփ Էմինի փողոցից դեպի Դավթաշենի կամրջի իջատեղ ձախ շրջադարձի արգելումը պայմանավորված է հետիոտների և մեքենաների երթևեկության անվտանգությունը,   ինչպես նաև հոսքերի անընդհատությունը ապահովելու անհրաժեշտությամբ: Այս մասին Auroranews-ին հայտնեցին Երևանի քաղաքապետարանից:

«Մասնավորապես` Գյուլբենկյան-Հովսեփ Էմին փողոցների խաչմերուկի կողմից երթևեկող և դեպի կամուրջ ձախ շրջադարձ կատարող մեքենաները խոչընդոտում էին Փափազյան-Հովսեփ Էմին փողոցների խաչմերուկի կողմից ուղիղ և դեպի աջ երթևեկող մեքենաներին, ինչպես նաև շտապողականություն ցուցաբերելու արդյունքում չէին զիջում փողոցը թույլատրելի մասում հատող հետիոտնին` առաջացնելով վրաերթի վտանգ: Նշված մանևրի արդյունքում հաճախակի էին նաև վթարները: Ձախ շրջադարձ կատարողները առաջացնում էին նաև հապաղումներ Հովսեփ Էմինի փողոցում` երկու ուղղություններով, ինչը շղթայական կերպով անդրադառնում էր մոտակա խաչմերուկներին»,- գրված է հաղորդագրության մեջ: