Զինված անձը կրակահերթ է արձակել զբոսաշրջիկների վրա․ Մեքսիկա

Մեքսիկայի հայտնի Տեոտիուական բուրգերի տարածքում զինված անձը կրակահերթ է արձակել զբոսաշրջիկների վրա, ինչի հետևանքով զոհվել է Կանադայի մեկ քաղաքացի, իսկ առնվազն 13 մարդ ստացել է վնասվածքներ։ Պատասխանատու պաշտոնյան հայտնել է, որ հարձակումն իրականացրել է 27-ամյա մեքսիկացի Խուլիո Սեսար Խասոն, ով հետագայում ինքնասպան է եղել։ Դեպքի վայրում իրավապահները հայտնաբերել են դանակ, հրազեն և զինամթերք։

Տեղական իշխանությունների փոխանցմամբ՝ հրազենային վիրավորում է ստացել 7 հոգի։ Մյուս տուժածների վնասվածքների հստակ հանգամանքները չեն մանրամասնվել, սակայն հայտնի է, որ կրակոցների ժամանակ մի քանի մարդ վայր է ընկել։ Բուժօգնության են դիմել տարբեր երկրների քաղաքացիներ, այդ թվում՝ 6 ամերիկացի, 3 կոլումբիացի, 2 բրազիլացի, ինչպես նաև մեկական Ռուսաստանի և Կանադայի քաղաքացիներ։ Վիրավորների թվում կա նաև 6 տարեկան երեխա։

Տեոտիուականի բուրգերը, որոնք գտնվում են Մեխիկոյի մոտակայքում և ներառված են ՅՈՒՆԵՍԿՕ-ի համաշխարհային ժառանգության ցանկում, ստեղծվել են երեք տարբեր հին քաղաքակրթությունների կողմից։ Այս համալիրը համարվում է Մեքսիկայի առանցքային զբոսաշրջային վայրերից մեկը։