Մակրոնը պետական այցով կժամանի Հայաստան

ՀՀ փոխվարչապետ Տիգրան Խաչատրյանը հանդիպում է ունեցել Հայաստանում Ֆրանսիայի արտակարգ և լիազոր դեսպան Օլիվիե Դըկոտինյիի հետ։

Կառավարությունից տեղեկացնում են, որ փոխվարչապետը հատուկ շեշտել է մայիսի 4-ին կայանալիք Եվրոպական քաղաքական համայնքի (ԵՔՀ) գագաթնաժողովի և հաջորդ օրը՝ մայիսի 5-ին, Ֆրանսիայի նախագահ Էմանուել Մակրոնի պետական այցի նշանակությունը։

Սպասվող այցին ընդառաջ կողմերը հանգամանալից քննարկել են երկկողմ փոխհարաբերությունների օրակարգային թեմաները։ Մասնավորապես, անդրադարձ է կատարվել խմելու ջրամատակարարման ու ջրահեռացման ոլորտներին, Հյուսիս-Հարավ ճանապարհային միջանցքի Սիսիան-Քաջարան հատվածի շինարարությանը ֆրանսիական կողմի մասնակցությանը, կրթական ոլորտի գործակցությանը, ինչպես նաև ռազմավարական այլ նախաձեռնություններին։

Զրուցակիցները կարևորել են ձևավորված կառուցողական համագործակցությունը՝ ուղղված առկա հարցերի արդյունավետ լուծմանն ու երկկողմ կապերի հետևողական զարգացմանը։