ՏԵՍԱՆՅՈՒԹ. Փոփոխություններ՝ Ղարաբաղից տեղահանված անձանց բնակապահովման ծրագրում. Թորոսյան

«Ղարաբաղից տեղահանված քաղաքացիների բնակապահովման ծրագրում փոփոխություններ կկատարվեն»,- հայտնել է ԱՍՀ նախարար Արսեն Թորոսյանը` նշելով, որ  Կառավարության որոշման փոփոխության նախագիծը տեղադրված է e-draft.am կայքում 

«Մինչ օրս մոտ 5700 հավաստագիր արդեն տրամադրվել է, և մոտ 2600-ն էլ իրացվել է: Այս թվերն ամեն օր աճում են, ինչը խոսում է այն մասին, որ մենք լուծում ենք մեր հայրենակիցների բնակապահովման հարցը աստիճանաբար և ամեն օր ավելի լայն թափով: Սակայն, նաև լսում ենք մեր հայրենակիցներին՝ ինչպես պաշտոնական հանդիպումների ժամանակ, այնպես էլ ամենօրյա մեր աշխատանքում, և այս ծրագիրը պարբերաբար փոփոխությունների է ենթարկվում, որպեսզի լուծենք այն խնդիրները, որոնք ի սկզբանե մենք չէինք կանխատեսել: Դրանց թվում է, օրինակ՝

• Ամուսնալուծված քաղաքացիների հարցը, որոնք չէին կարողանում առանձին հավաստագիր ստանալ, և այս որոշմամբ կփորձենք լուծել:
• Դրական մնացորդի օգտագործման ավելի մեծ հնարավորություններ ենք տալիս՝ տարածքում վերակառուցման, նոր հողամասում նոր շինության կառուցման հնարավորություններ:
• Միջգերատեսչական հանձնաժողովին հնարավորություն ենք տալու որոշակի դեպքերում ապացուցել բնակմակերես ունենալու (նախկինում ունենալու) հանգամանքները, որոնք չէին կարողանում կադաստրային փաստաթղթերով ապացուցել:
• Հնարավորություն կտանք հավաստագրերի միավորման, երբ արդեն տրված հավաստագիր կա և մեկ ուրիշ ընտանիքի հավաստագիր կկարողանան միավորել՝ բնակարանային հարցերը լուծելու համար»,- ասել է Թորոսյանը: