Փաշինյանը խոսել է Ռուսաստանի հետ հարաբերություններից

 ՀՀ վարչապետ Նիկոլ Փաշինյանը, ներկայացնելով «Քաղաքացիական պայմանագիր» կուսակցության նախընտրական ծրագիրը, ընդգծել է, որ Հայաստանը զարգացնելու է փոխշահավետ ու կառուցողական կապեր Ռուսաստանի հետ։ Նրա խոսքով՝ այդ հարաբերությունների նշանակությունը դժվար է գերագնահատել։ 

Պարզաբանելով «կառուցողական տրանսֆորմացիա» եզրույթը՝ վարչապետը նշել է, որ երկկողմ հարաբերությունները նախկինում ձևավորվել են Ղարաբաղյան շարժման պայմաններում։ Այժմ, երբ կոնֆլիկտն ավարտված է և հաստատվել է խաղաղություն, հարաբերությունները պետք է հարմարեցվեն ու զարգանան նոր տրամաբանությամբ։ Որպես օրինակ Փաշինյանը մատնանշել է երկաթուղային հաղորդակցության առկայությունը, որը նախկինում չի եղել և միանշանակ կառուցողական ազդեցություն է ունենալու։ 

Կառավարության ղեկավարը շեշտել է, որ թույլ չեն տալու հայաստանյան որոշ ուժերի կողմից հարաբերություններում ճգնաժամեր հրահրելու փորձերը և ջանքեր են ներդնելու կառուցողական գործակցության զարգացման համար։ Նա հավելել է, որ դա պետք է տեղի ունենա հավասարակշռված արտաքին քաղաքականության շրջանակներում։