Ալիևի հայտարարությունը` Հայաստանի և Ադրբեջանի մասին

Ադրբեջանի նախագահ Իլհամ Ալիևը հայտարարել է, որ ավելի քան 80,000 մարդ արդեն վերադարձել է Ղարաբաղ և «Արևելյան Զանգեզուր»։

Ադրբեջանի նախագահ Իլհամ Ալիևը ՄԱԿ-ի Ասիայի և Խաղաղ օվկիանոսի տնտեսական և սոցիալական հանձնաժողովի 82-րդ նստաշրջանի մասնակիցներին հասցեագրված ուղերձում նշել է, որ ավելի քան 80,000 մարդ վերադարձել է Ղարաբաղ և «Արևելյան Զանգեզուր»՝ իրենց կյանքը վերակառուցելու և աշխատելու համար։ Ադրբեջանական լրատվամիջոցների փոխանցմամբ՝ երկրի ղեկավարն իր խոսքում անդրադարձել է «Մեծ վերադարձ» ծրագրի հաջող ընթացքին և օկուպացիայի շրջանում ավերված տարածքների վերականգնման լայնածավալ նախագծերին։

Ալիևի խոսքով՝ հանդիպումն անցնում է աշխարհաքաղաքական լարվածության և գլոբալ անորոշության պայմաններում, ինչը վկայում է միջազգային խաղաղության փխրունության մասին։ Նա շեշտել է Ադրբեջանի հավատարմությունը պետությունների տարածքային ամբողջականության սկզբունքներին՝ հիշեցնելով, որ երկիրը լիովին վերականգնել է իր ինքնիշխանությունը։

Ըստ ուղերձի՝ Հայաստանի հետ մեկնարկած խաղաղության օրակարգն արդեն արդյունքներ է տալիս։ Բաքուն և Երևանը հաստատել են առևտրային կապեր, Ադրբեջանը պայմաններ է ստեղծել դեպի Հայաստան տարանցման համար, իսկ քաղաքացիական հասարակության ներկայացուցիչների փոխադարձ այցերը նպաստում են վստահության ամրապնդմանը։

Միևնույն ժամանակ, Ալիևը մտահոգություն է հայտնել ականների սպառնալիքի վերաբերյալ։ Նա տեղեկացրել է, որ 2020 թվականի պատերազմի ավարտից հետո ականների պայթյունների հետևանքով ավելի քան 400 ադրբեջանցի խաղաղ բնակիչ է զոհվել կամ վիրավորվել։ Նախագահի պնդմամբ՝ այս խնդիրը պահանջում է լայն միջազգային համագործակցություն։