Երրորդ անձը կարող է ունենալ իր շահերն ու ընկալումները. Փաշինյան

Նիկոլ Փաշինյանը ներկայացրել է «Քաղաքացիական պայմանագիր» կուսակցության նախընտրական ծրագիրը՝ շեշտելով, որ քաղաքական ընդդիմությունը հաճախ է իշխող ուժին և անձամբ իրեն մեղադրում թուրքամետ ու ադրբեջանամետ լինելու մեջ։

«Իսկ ի՞նչ է տեղի ունեցել և տեղի ունենում իրականում։ Իրականում տեղի է ունեցել հետևյալը. Ադրբեջանի և Թուրքիայի հետ հարաբերություններում մենք միշտ գործել ենք երրորդ երկրների միջոցով, այսինքն՝ մեր ասելիքներն ու օրակարգերը 90 և ավելի տոկոսով քննարկել ենք երրորդ երկրների միջոցով։ Եվ ի՞նչ ենք մենք արձանագրել։ Արձանագրել ենք մի շատ պարզ բան, որն ունի օբյեկտիվ և սուբյեկտիվ հիմքեր։ Երբ դու երրորդ անձի միջոցով ես շփվում որևէ մեկի հետ, երբեք չես կարող համոզված լինել, որ քո ուղերձները երրորդ անձը հասցեատիրոջը ճիշտ է փոխանցում, և նրա ուղերձները փոխանցելիս նույնպես ճշգրիտ է գործում, որովհետև երրորդ անձը կարող է ունենալ իր պատկերացումները, շահերն ու ընկալումները, և մենք երբեք չգիտենք, թե որոնք են դրանք»,– նշել է կառավարության ղեկավարը։

Վարչապետի պնդմամբ՝ Հայաստանի ու Ադրբեջանի միջև խաղաղության գործընթացի սկիզբը կապված է իշխանությունների կողմից հավասարակշռման և հավասարակշռված արտաքին քաղաքականության հայեցակարգի որդեգրման հետ։

Ըստ Նիկոլ Փաշինյանի՝ այդ քաղաքականությունն ապացուցել է իր արդյունավետությունը՝ հնարավորություն տալով կայունացնել երկրի արտաքին միջավայրը։ Հավասարակշռված և հավասարակշռման արտաքին քաղաքականությունը կդառնա ռազմավարություն, որի հիմնական նպատակն արտաքին հարաբերություններում անհամաչափությունների բացառումը կամ դրանց հավասարակշռման գործիքակազմ ունենալն է։

Գործադիրի ղեկավարը կարևորել է տարածաշրջանային տրանսպորտային ենթակառուցվածքների ամբողջական ապաշրջափակումը։ Խոսքը վերաբերում է թե՛ TRIPP նախագծին, թե՛ Գյումրի-Կարս երկաթուղու վերագործարկմանը։ Ըստ նրա՝ սա ոչ միայն կամրապնդի խաղաղությունն ու համագործակցությունը, այլև տարածաշրջանը կդարձնի Հյուսիս-Հարավ և Արևելք-Արևմուտք ուղղությունների միջև փոխկապակցվածության հանգույց՝ «Խաղաղության խաչմերուկ»։