Ռուսաստանը կհարձակվի․ Շվեդիայի հետախուզությունը՝ Մոսկվայից բխող սպառնալիքների մասին

Շվեդիայի զինված ուժերի հրամանատար Միքայել Կլասոնը հայտարարել է, որ Ռուսաստանը հնարավոր է նախապատրաստում է գործողություններ Հյուսիսատլանտյան դաշինքի դեմ։ The Times պարբերականին տված հարցազրույցում բարձրաստիճան զինվորականը նշել է, որ պաշտոնական Մոսկվան կփորձի «շոշափել հողը»՝ հասկանալու համար, թե ինչպես կարձագանքի դաշինք հնարավոր ճգնաժամերին, հատկապես Եվրոպայի և ԱՄՆ-ի միջև առկա քաղաքական տարաձայնությունների։

Որպես հավանական թիրախ դիտարկվում է ռազմավարական նշանակություն ունեցող Գոտլանդ կղզին։ Ըստ Կլասոնի՝ կղզին կարող է ենթարկվել հանկարծակի հարձակման ինչպես ծովային, այնպես էլ օդադեսանտային ճանապարհով։ Այդուհանդերձ, շվեդական հրամանատարությունը շեշտում է, որ Ռուսաստանը տիրապետում է գործողությունների իրականացման բազմաթիվ այլ սցենարների ևս, ինչը ստիպում է պահպանել զգոնությունը։

Զուգահեռաբար, Շվեդիայի ռազմական հետախուզությունն իր վերջին զեկույցում մատնանշել է Ռուսաստանից բխող սպառնալիքների աճի միտումը։ Փորձագետները կանխատեսում են, որ տարածաշրջանում լարվածությունը կշարունակի մեծանալ՝ պայմանավորված աշխարհաքաղաքական նոր իրողություններով և Բալթիկ ծովի նկատմամբ վերահսկողության ուժեղացման ձգտումներով։